Кошаркарот на Виртус Болоња, Ахиле Полонара повторно се соочува со тежок период во животот и откако пред две години го победи ракот, сега боледува од леукемија, потврди неговиот клуб.

Италијанскиот евролигаш преку официјално соопштение потврди дека на 32-годишниот крилен играч му била дијагностицирана миелоидна леукемија.

Полонара, кој пред неколку години успешно ја доби битката со рак на тестисите и се врати на кошаркарските терени, сега го чека уште една борба на негов личен план.

„Во изминатите недели врз Ахиле Полонара беа извршени серија специјалистички прегледи, кои потврдија дека станува збор за миелоидна леукемија. Целото семејство на Виртус му испраќа поддршка и искрени желби за брзо и целосно заздравување“, стои во соопштението на клубот од Болоња.

Во моментов Полонара се наоѓа на лекување во специјализирана клиника, но засега нема информации за неговата точна здравствена состојба ниту за стадиумот на болеста. Останува надежта дека овој борец и патриот, кој секогаш даваше максимум на теренот, повторно ќе излезе како победник од уште една тешка битка со животот.