Италијанската премиерка Џорџа Мелони се прости од прочуениот моден креатор Џорџо Армани, кој денеска почина на 92-годишна возраст.

„Не напушти Џорџо Армани. Со својата елеганција, едноставност и креативност знаеше да ѝ даде сјај на италијанската мода и да го инспирира целиот свет. Икона, неуморен работник, симбол на најдоброто од Италија. Ти благодариме за сè“, напиша Мелони на социјалната мрежа Икс.

Ci lascia a 91 anni Giorgio Armani. Con la sua eleganza, sobrietà e creatività ha saputo dare lustro alla moda italiana e ispirare il mondo intero. Un’icona, un lavoratore instancabile, un simbolo dell’Italia migliore. Grazie di tutto. pic.twitter.com/Rwyu4mXW54

— Giorgia Meloni (@GiorgiaMeloni) September 4, 2025

Со голема тага, „Армани груп“ ја објави смртта на својот основач и движечка сила. Армани беше синоним за современиот италијански стил и елеганција. Со својот талент и деловна остроумност изгради империја која годишно остваруваше приходи од околу 2,3 милијарди евра.

Последниве месеци неговата здравствена состојба беше нарушена, а во јуни беше приморан да ја откаже својата ревија на Неделата на машка мода во Милано – првпат во неговата долгогодишна кариера да изостане од ваков моден настан.

Нарекуван „Крал Џорџо“, тој беше познат по тоа што лично се грижеше за секој аспект од колекциите – од кројот и материјалите до изгледот на моделите пред излегување на пистата.

Во сабота и недела во Милано ќе биде поставена комеморативна сала, а потоа ќе се одржи приватен погреб, најави компанијата.