Италијански суд нареди заплена на 779,5 милиони евра (835 милиони долари) од компанијата за краткорочно изнајмување на места за престојување ЕрБНБ, поради наводно затајување данок. Обвинителите велат дека фирмата не успеала да наплати данок од сопствениците на околу 3,7 милијарди евра приход од изнајмување на апартмани.

Сопствениците во Италија се обврзани да платат данок од 21% на нивната заработка. Од ЕрБНБ изјавија за Би-Би-Си дека се „изненадени и разочарани од пресудата објавена од италијанскиот јавен обвинител“.

Портпаролот на ЕрБНБ, Кристофер Нутли, рече дека европското седиште на компанијата работи на решавање на проблемот со италијанската даночна агенција од јуни. Нутли вели дека е уверен во тоа дека компанијата постапила во целосна согласност со законот и има намера да ги оствари нивните права во однос на ова прашање.

Под истрага се и три лица кои имале менаџерски улоги во ЕрБНБ од 2017 до 2021 година, се вели во соопштението на обвинителите на Миланскиот трибунал.

Во 2022 година, ЕрБНБ го оспори италијанскиот закон со кој се бара од компанијата и другите даватели на краткорочни изнајмувања да задржат 21% од приходот од изнајмување од сопствениците и да го платат на даночните власти. Фирмата тврди дека барањата на Италија за оданочување се спротивставени на принципот на Европската унија за слобода за обезбедување услуги низ блокот од 27 земји.

Врховниот суд на ЕУ подоцна пресуди дека ЕрБНБ треба да ги почитува барањата. Во последниве години, италијанските власти ја зголемија контролата на даночните практики на големите компании како ЕрБНБ, која работи во земјата од 2008 година.

Италијанските обвинители започнаа истраги поврзани со даноците против Нетфликс и Мета, според извештаите на медиумите. Минатиот месец, италијанските политичари рекоа дека планираат да преземат мерки против сопствениците кои не плаќаат даноци за краткорочни изнајмувања преку платформи како ЕрБНБ. Ковладејачката партија Форца Италија објави дека земјата ќе се придвижи кон воведување национален код за идентификација за краткорочно изнајмување.

„Таа шифра ќе ги извади приходите на оние кои изнајмуваат станови без да ги пријават“, им рече на новинарите лидерот на Форца Италија и вицепремиер Антонио Тајани.

Политичарите проценуваат дека овој потег би можел да ги зголеми фискалните приходи на Италија за 1 милијарда евра.