Ново истражување открива дека жените кои користат веганска исхрана се изложени на поголем ризик од развој на компликации за време на бременоста. Овие трудници се изложени на поголем ризик од развој на прееклампсија и раѓање на бебиња со недоволна тежина, пишува „Њујорк пост“.

Во студијата на Универзитетот во Копенхаген, истражувачите ги анализирале податоците од 66.738 бремености на жени од Данска меѓу 1996 и 2002 година. Од нив, 65,872 жени се истакнале како сештојади, 666 како вегетаријанки кои јадат риба и живина, 183 како вегетаријанки и 18 како целосни вегани.

Врз основа на прашалникот даден на испитаниците, истражувачите откриле дека внесот на протеини е помал кај вегетаријанците (13,3 отсто) и веганите (10,4 отсто) во споредба со жените кои јаделе сè што е во нивната исхрана (15,4  отсто).

Затоа, тие заклучија дека нискиот внес на протеини може да биде поврзан со ниската родилна тежина на детето.

„Внесувањето на микронутриенти исто така беше значително помало кај веганите, но кога беа земени предвид додатоците во исхраната, не беа забележани големи разлики“, пишуваат истражувачите.

Меѓутоа, доколку бремените жени не земаат додатоци во исхраната  со кои внесуваат железо и витамин Б12 во телото, кои вообичаено би ги добиле преку храна, може да настанат компликации и развој на прееклампсија и сродни нарушувања во бременоста.

Прееклампсијата е сериозна компликација во бременоста која ги погодува и мајката и нероденото дете. Тоа е состојба која се развива по дваесеттата недела од бременоста, а се карактеризира со висок крвен притисок и нивоа на протеини во урината.

Ако се развие, може да ја наруши функцијата на бубрезите и црниот дроб, да влијае на згрутчувањето на крвта, да доведе до течност во белите дробови, да предизвика напади и во тешки случаи, смрт за мајката и детето.