Истражувањe открива: Тинејџерите со повеќе браќа и сестри имаат повеќе проблеми со менталното здравје
Научниците во последното истражување открија дека тинејџерите со повеќе браќа и сестри имаат полошо ментално здравје. За време на истражувањето, тие поставиле прашања за менталното здравје на 9.100 осмоодделенци во САД и 9.400 во Кина, со просечна возраст од 14 години, пишува „Гардијан“.
Препорачано
Во Кина, тинејџерите без браќа и сестри биле „најсреќни“, додека оние од САД со еден брат или сестра имале слично ментално здравје како оние без. Севкупно, истражувањето покажало дека колку повеќе браќа и сестри имале тинејџерите, толку е полошо нивното ментално здравје.
Ова е поизразено кај тинејџерите со постари браќа и сестри или во случај кога меѓу нив нема голема разлика во години.
Социологот Даглас Дауни од Државниот универзитет во Охајо и неговите колеги објаснуваат дека резултатите од студијата се совпаѓаат со теоријата за „родителски ресурси“.
„Ако мислите дека родителските ресурси се како торта, едно дете ќе ја изеде целата торта. Колку повеќе деца има во семејството, толку помалку секој од нив ќе добие, односно ресурси и родителско внимание, а тоа може да влијае на нивното ментално здравје“, велат научниците.
Постојат и други можни објаснувања. На пример, тинејџерите со најдобро ментално здравје потекнуваат од семејства со најдобри социо-економски услови; што може да влијае и на нивната психолошка состојба. Во САД, тоа често биле семејства со само едно или две деца. Во Кина тоа биле семејства со едно дете.
Треба да се напомене дека некои претходни студии укажаа на голем број позитивни ефекти поврзани со поголемото семејство; што покажува дека се работи за повеќеслоен проблем кој не може да се види само од еден агол.
Според една студија, исто така, спроведена од социологот Дауни, децата со повеќе браќа и сестри подобро се сложувале со другите деца во градинка и имале помала веројатност да се разведат подоцна во животот; можеби затоа што веќе имале одредено искуство во соживот и снаоѓање во блиски врски.
Студијата од 2016 година на повеќе од 100.000 норвешки деца покажа дека децата во поголемите семејства имаат подобро ментално здравје.
