Лицата постари од 65 години, кои се занимаваат со хоби се чувствуваат поздраво, позадоволно и покажуваат помалку симптоми на депресија од оние кои не се склони кон никакви редовни активности во слободното време, пишува „Еуроњус“.

Овие резултати се добиени од опсежната научна анализа на пет студии, кои вклучија учесници од 16 земји околу светот. Истражувачите веруваат дека од овие многу конкретни податоци, креаторите на општествените политики, би можеле да извлечат поука и да преземат соодветни мерки.

Како дел од истражувањето, чии резултати беа објавени во септемвриското издание на списанието „Нејчр медисин“ („Nature Medicine“), беа испитани повеќе од 93.000 луѓе со просечна возраст меѓу 71,7 и 75,9 години во САД, Кина, Јапонија и некои од Европските земји. Учесниците одговараа на прашања за нивните слободни активности и придобивките што им ги носат.

Авторите на студијата заклучиле дека испитаниците кои се занимаваат со хоби и уживаат во слободните активности кои им одговараат, се чувствуваат подобро и посреќно. На резултатите не влијаеле факторите како што се, постоењето на партнерство, статусот на вработување или редовниот приход на домаќинството.

Терминот „хоби“ се користи за опишување на активност што луѓето претпочитаат да ја прават во слободното време, сами или со други, заради задоволство и забава, како што е, на пример, сликарство или други уметности, правење разни предмети, читање, спортување, градинарство, волонтирање, членство во клуб.

Единственото ограничување на студијата е, дека таа била само набљудувачка и затоа не ја докажува причинската врска помеѓу практикувањето на некое хоби и помалиот ризик на симптоми на депресија.