САД очекуваат сите 193 членки на Генералното собрание вечер едногласно да ја усвојат историската прва резолуција на Обединетите нации за вештачката интелигенција.
Целта на резолуцијата е да се обезбеди новата технологија да биде „безбедна, сигурна, доверлива и универзално пристапна“, особено до понеразвиените земји.

Новата глобална технологија има огромна моќ да решава проблеми и да го подобри квалитетот на животот, но во исто време може и да „му пресуди“ на човештвото ако се злоупотреби за воени цели, за продлабочување на јазот на распределба на богатството или за дезинформирање и ширење омраза. Затоа и компаниите што ја развиваат вештачката интелигенција и владите настојуваат да го регулираат развојот на револуционерната технологија, за да му служи на човештвото, а не да му се заканува.

Нацрт-резолуцијата, предложена од САД, пред сѐ, е насочена кон надминување на дигитатлниот јаз меѓу развиените и сиромашните земји за да обезбеди споделување на ползата во сите сфери – од побрзо и попрецизно дијагностицирање болести и создавање лекови, преку подобри метеоролошки прогнози заради навремена евакуација на население, па сѐ до подобрување на работните услови во многу индустриски гранки.

– Имајќи ги предвид забрзаниот развој и употребата на вештачката интелигенција, се наметнува итноста од постигнување глобален консензус системите на ВИ да бидат безбедни и доверливи – се наведува во документот.

Се укажува и на потребата за дискусии за можните пристапи за управување со системите за вештачка интелигенција. Американските власти, на пример, претпочитаат главната улога во регулирањето на вештачката интелигенција да им ја остават на компаниите што ја развиваат новата технологија, а Пекинг има цел да задржи строга контрола. Во Европската Унија, пак, европратениците пред една недела ги усвоија првите правила за развој и користење на вештачката интелигенција и тие ќе се применуваат веќе од мај или јуни.

Водечките компании за развој на ВИ ја прифаќаат потребата за регулирање на новата технологија, но природно се залагаат за рамка од која би извлекле полза и профит.

Советникот на Белата куќа за национална безбедност Џејк Саливен изрази надеж дека резолуцијата ќе биде усвоена со консензус.

– Резолуцијата ќе претставува глобална поддршка за основните принципи за развој и употреба на вештачката интелигенција, со цел да се трасира патека системите со ВИ да се користат за општо добро, а и да се намалат ризиците – изјави Саливен.

Документот ги охрабрува „сите земји, меѓународни и регионални организации, технолошки заедници, граѓанското општество, медиумите, академиите, истражувачките институти и физички лица да развиваат и да поддржат рамки и пристапи за регулирање и управување за да бидат безбедни системите на вештачката интелигенција“. Во исто време се предупредува на „неправилни или малициозни дизајни, развои, вградувања и користења на вештачката интелигенција, без системи за надгледување или на начини спротивни на меѓународното право“.

Конечната цел на оваа иницијатива е користењето на АИ заради „полесно постигнување на целите на ОН за глобален развој до 2030 година“, кои опфаќаат искоренување на гладот и сиромаштијата, обезбедување квалитетно образование за сите деца и родова еднаквост“.