Околу 60 деца од три паралелки од второ и трето одделение кои учат во подрачното основно училиште „Димитар Поп Георгиев – Беровски“ во општина Ѓорче Петров немаат соодветни услови за следење на наставата. Тие наставата ја следат во нестандардно мали училници, што особено станува алармантно, бидејќи нема услови да се почитуваат протоколите на Комисијата за заразни болести за заштита од ковид-19.

На лошите услови во училиштето се пожалија неколкумина родители на деца кои секојдневно во овие мали училници поминуваат повеќе часови.

– Не можам да разберам како можат надлежните да дозволат да се учи во вакви училници кои се како една дневна соба, а во нив има цело одделение. Се прашувам дали министерката Царовска или некој од инспекторатот ги виделе училниците во кои учат нашите деца. Бараме итно решевање на овој проблем, вели родител на ученик за „Слободен печат“ кој сакаше да остане анонимен.

Од Општина Ѓорче Петров велат дека имале разговор со родителите на кои им ја објасниле причината за преполовување на училниците.

– Јас се согласувам дека училниците се помали за разлика од стандардните, но од две зла го избравме помалото. Требаше да бираме дали да нема простор за некои ученици, па да ги препраќаме во друго училиште, или да направиме простор во училиштето. Одлучивме неколку училници да ги поделиме на пола, и во нив настава следат по околу 20 ученици. Но, ова е само привремено решение. Во тек се градежни активности за доградба на училиштето. Имаме најави дека до крајот на годината тој градежен зафат ќе биде завршен, по што и овие ученици ќе добијат соодветен простор, изјави за „Слободен печат“ раководителката на секторот обраазование во општина Ѓорче Петров, Соња Палчевска-Ќосева.

Од МОН велат дека  договорот со изведувачот за доградба на училиштето е со времетраење до јуни 2022.

– Изведувачот што ги изведува градежните работи за доградба на крило на овој објект има склучен договор со МОН со времетраење до јуни 2022 година. Изведувачот од почетокот на времетраење на договорот работи побрзо од планираната динамика и се очекува да заврши со градежните активности до крајот на 2021 година.  Инаку, новопроектираниот објект е со површина од 750 м2 и опфаќа приземје и кат на кои ќе има 6 нови училници, 2 простории за наставниците, стандардни и тоалети за ученици со посебни потреби, лифт и простории за разговор со родители. Вредноста на инвестицијата е 25,4 милиони денари, информираат од МОН.

ПО НАЈНОВА МОДА: Училиште во Ѓорче доби половични училници, децата нека се стиснат