Иранскиот боксер, Мохамад Џавад Вафаеи-Сани (26) е осуден на смрт поради учеството во демостранциите кои се случија во 2019 година, објавија невладини организации за човекови права.

Вафаеи-Сани е осуден на смрт поради палење и уништување на владини објекти, објави невладината организација Иран Хјуман Рајтс (ИХР) чие седиште е во Норвешка.

Тој е приведен во февруари 2020 година поради протестите кои се одржаа во ноември 2019 година, а кои беа предизвикани од зголемените цени на горивата.

Неговата судбина потсетува на 27-годишниот борач Навид Афкари кого иранските власти во ноември 2020 година го обесија поради убиство за време на протести. Невладините организации ја обвинија владата дека признанието за убиство било извлечено со мачење.