Секое тело е убаво на свој начин, а секој од нас има по некоја несовршеност, која не ја дефинира нашата убавина. Сепак, целулитот е визуелен проблем што мачи илјадници жени низ светот, особено во летниот период кога носиме отворена облека и сакаме да изгледаме што е можно посовршено.

На оваа тема разговараме со Вилма Ѓорѓиќ, која е сертифициран масер од Скопје. Таа речиси 10 години се занимава со оваа професија, а во последните пет години успешно го води својот салон „Лејдибокс“, каде што го нуди ефикасниот третман за целулит – мадеротерапија.

Целулитот е нешто со што се соочуваат 90 отсто од жените во светот. Иако е нормална појава, многумина го доживуваат како голем естетски проблем. Па, како би го дефинирале целулитот и зошто се појавува?

– Целулитот претставува промена на масното и сврзното ткиво, која настанува поради вишок масти наталожени на тој дел од телото, нарушување на циркулацијата и ослабено сврзно ткиво. За жал, и генетиката игра улога, но и во тој случај постои решение.

Какви видови целулит постојат?

– Постојат три вида целулит – адипозен, воден и фиброзен. Адипозен е најблагата форма на целулит, кој настанал поради лоша исхрана и нередовна активност. Тој најчесто е видлив кога ќе ја притиснеме кожата. Водениот целулит е најчест и настанува поради задршка на течности. Фиброзниот целулит е најтешка форма. Визуелно, тој се манифестира како нерамнини, тврда кожа и испакнатини. За сите видови целулит е важна дренажата, но за оваа последна форма е клучно да се прават редовни масажи и да се запази внесот на вода.

Мадеротерапијата е една од најпопуларните масажи со кои се третира целулитот. Дали може да ни објасниш за каков третман станува збор и која е најголемата полза од овие масажи?

– Мадеромасажите се антицелулитни масажи што се изведуваат со помош на дрвени помагала (оклагии), кои ги има во различни форми и големини и имаат различна цел. Најголемата полза од мадеромасажите е постојаната дренажа, која е клучна за разградување на целулитот, поткревање на тонусот на кожата, детокс на лимфите, поттикнување на хормоните на среќа и задоволство затоа што секоја масажа е, пред сѐ, терапија за мозокот.

Иако е индивидуално, колку третмани се потребни за да се постигнат видливи резултати?

– Како што кажавте и самите, тоа е доста индивидуално и многу е важно каква цел има клиентот. Но, за некои првични видливи резултати се потребни околу 20 масажи на почетокот, па сѐ до посакуваната цел.

Дали постојат одредени групи луѓе што не смеат да практикуваат мадеротерапија и дали има возрасна граница?

– Мадеротерапија не се препорачува за оние лица што имаат проширени вени или кои примаат сериозни терапии за висок крвен притисок. Старосна граница нема и најрано може да се почне од 16-17 години, секако со дозвола од родител/старател. Исто така, бремени жени во првото тримесечје не е пожелно да прават мадеротерапија. Понатака, во бременоста е одлично да се прави лесна мадеромасажа и да се олеснат симптомите на задршка на вода, која најчесто се појавува кај трудниците.

Покрај мадеротерапијата, познато е дека се препорачува здрава исхрана и редовна физичка активност за подобрување на состојбата со целулитот. Кои се твоите совети во овој поглед?

– Многу вода, балансирани оброци, физичка активност во минимално времетраење од 20 минути во денот и редовни масажи, бидејќи тие се клучни за визуелно да се изгуби целулитот.