Фолк-пејачката Татјана Лазаревска неодамна го прослави својот 49-ти роденден. Нема сомнеж дека роденденот помина со песна и журка, оти Тања важи за една од оние жени што знаат како да го кренат расположението.

„За роденденот беше супер, па како може да биде. Со журка и со најблиските дома сѐ беше прекрасно и многу спонтано. Журка за мерак. И да бидам искрена, и овој роденден го добив најпосебниот подарок – вниманието и љубовта од моето семејство и од пријателите“, ни открива Лазаревска во интервјуто за „Слободен печат“.

Тања вели дека сега кога е на прагот на 50-тата, се чувствува среќно, убаво и исполнето.

„Наполнив 49 години и сум на прагот на 50-тата. Многу се радувам и едвај ги чекам, затоа што мене годините воопшто не ме плашат. Досега одлично си ги носам, мислам и духовно и психички, па богами и физички. Во кондиција сум како за стотка“, искрена е фолк-пејачката.

На прашањето, пак, како ја одржува убавината и дали смета дека на секоја жена ѝ се потребни естетски корекции за да го одржи младешкиот изглед, таа вели: „Убавината ме одржува мене. Шегата настрана, немам ништо против естетските корекции, но јас сѐ уште сум 100 отсто природна“.

„Единствен ритуал ми е нега на косата и на лицето со убава козметика“, раскажува Татјана.

Во Австралија веќе живее со години, со децата и со сопругот Новица. Не крие дека животот во Австралија си има свое влијание и носи промени.

„Животот во Австралија ме промени, секако и мене и моето семејство. Со самата промена на средината и поразличен животен стил, се адаптиравме и ние, па еве ќе кажам дека овде станав многу повредна, работам и во градинка и, секако, пеењето. Овде бидејќи ја немаме пошироката фамилија, некако си се посветивме целосно ние четворицата меѓу себе и така си пливаме заеднички низ животот“, искрена е Татјана.

Но, сепак, додава таа, „меѓу градинката и пеењето, секогаш ќе го изберам пеењето, затоа што сцената е мојот живот“.

Летово со Новица и со синовите Стефан и Петар беа речиси два месеца во Скопје. Новица беше првпат дојден по 9 години откако си заминаа за Австралија. Тања вели дека секогаш се радува кога си доаѓа дома, затоа што Македонија е „нивното гнездо“.

„Секогаш кога ќе имаме можност, ќе си доаѓаме во нашата земја. Убаво е во Австралија, но домот ни е тука. Морам да кажам дека секогаш и најмногу ми недостасуваат моите најблиски, моите пријатели и колегите“, со емоции раскажува Татјана.

Синовите Стефан и Петар откако дојдоа во Македонија, првпат летово, покажаа интерес за музика. Тања вели дека тоа е најголемата радост што им се случила, затоа што досега не покажувале интерес за музика.

„Едниот спортист, другиот сакаше бербер, ама еве сега си го бараат својот пат. Но, најмногу ми е драго и се радувам што по посетата на Македонија, им се разбуди желбата за народна музика“, вели фолк-пејачката.

За тоа дали е строга мајка и колку е блиска со синовите, Тања вели: „Ние сите сме многу блиски и сите работи ги делиме меѓу себе. Секогаш дискутираме заедно и донесуваме одлуки. Јас и Новица се трудиме да бидеме и родители и пријатели со нашите деца за поцврста и поздрава конекција со нив, затоа што денешницава е немилосрдна“.

Меѓу животот во Австралија и љубовта кон Македонија, семејство на Тања го живее своето секојдневие во Мелбурн. Наскоро ќе се одржи нивната турнеја во Америка, која ќе биде во септември.

„Годинава и Петар и Стефан доаѓаат со нас како поддршка, а можеби и музичка, затоа што моментално се учат да свират на тапани“, вели Татјана.