Поп-пејачката Мартија Станојковиќ неодамна наполни 21 година и имаше две роденденски журки. Вели дека најубавиот подарок што го добила е присуството на сите пријатели и блиски што ги поканила на забавата. Среќна, исполнета, вљубена, зборува во интервјуто за „Слободен печат“.

Неодамна го прослави 21-виот роденден. Имаше две забави. Како ги прослави?

– Две вечери по ред славев, затоа што 21-виот роденден ми беше значаен момент и сакав да го поминам со сите што ми се важни. Првата прослава ја направив дома, во семеен круг со моите најблиски, роднини и семејство. Атмосферата беше топла, емотивна и многу посебна. Втората вечер ја прославив во Скопје, во ресторан, со моите пријатели и соработници, луѓе со кои поминувам многу време, и професионално и лично. И двете прослави беа културни, елегантни, полни со убави разговори, смеа и моменти што ќе ги паметам.

Доби ли некој посебен подарок?

– Искрено, добив навистина многу подароци од најразлични луѓе, секој со своја симболика. Но за мене, најголем подарок беше присуството на сите поканети. Не е мала работа кога ќе видиш дека сите што ги сакаш се таму за тебе, дека се расположени, насмеани, и дека навистина ја делат радоста со тебе. Тоа ми беше највредниот момент, заедништвото, љубовта и искрените желби.

Не е тајна дека на семејната забава беше и твоето момче Матеј. Колку време сте во љубовна врска и како почна љубовта?

– Со Матеј сме заедно речиси две години. Нашата приказна почна многу природно, како пријатели што постепено се зближуваат. Ништо не беше наметнато, сè течеше со свое темпо и токму тоа ја направи нашата врска вистинска и стабилна. Од првиот ден ме третираше со почит, со разбирање и со емпатија, а сето тоа прерасна во длабока љубов.

Колку Матеј ти е поддршка кога е во прашање музичката кариера?

– Матеј е една од најважните личности во мојот живот. Тој ми е најголема поддршка, не само во музиката, туку и во сè што правам. Успехот не е само резултат на труд и талент, туку и на луѓето околу тебе. Кога партнерот те охрабрува, верува во тебе, те разбира дури и во тешките денови, тоа е непроценливо. Без неговата енергија, насмевка и разбирање, сигурно ќе ми беше многу потешко.

Ајде малку за музиката… Што се случува на музички план и какви новитети подготвуваш?

– Во моментов сум фокусирана на создавање нова музика. Работам на неколку песни што ќе излезат годинава, и вложувам многу емоција, искреност и креативност. Секоја песна ја гледам како моја приказна, важно ми е секој збор и секој тон да носи чувство. Сакам да направам музика со која публиката ќе се поврзе, ќе се пронајде и ќе ја почувствува мојата енергија.

Од многу мала си дел од музичката сцена…Како почна твојата музичка приказна?

– Моето музичко патување започна кога бев многу мала, со учество на „Пинкови ѕвездички“, каде што го освоив второто место. Тоа искуство ми ги отвори вратите кон светот на музиката и сцената. Потоа, следуваше детската Евровизија, а понатаму и заминувањето во Америка, каде што имав привилегија да снимам во едно од најпознатите студија, истото каде што своите почетоци ги имале Лејди Гага, „Дестини чајлд“ и многу други. Таму не само што учев и снимав, туку и слушнав неколку неиздадени песни од светски ѕвезди, нешто што засекогаш ќе го носам како инспирација. Денес чувствувам одговорност да придонесам за македонската поп-сцена, која, според мене, има потреба од нови, искрени и модерни гласови.

Очекуваше ли дека ќе бидеш дел од домашната сцена и дека ќе уживаш во успехот и популарноста?

– Од мала интуитивно знаев дека сцената ќе биде моето место. Можеби нецелосно свесна за тежината на јавниот живот, но секогаш чувствував дека сакам да комуницирам преку музика. Денес, кога гледам наназад, благодарна сум за сè што ми се случило, и лесните и тешките моменти. Сето тоа ме изгради и ми помогна да ја прифатам јавноста не како товар, туку како привилегија. Публиката ми е инспирација.

Со своите настапи ги поместуваш границите, неретко знаеш да објавиш и провокативни фотографии. Се соочуваш ли со невкусни коментари и како реагираш?

– Секако дека има секакви коментари. Јавниот живот секогаш оди заедно со туѓите мислења, и позитивни и негативни. Но, најважно ми е што од луѓето добивам многу убави пораки, поддршка и љубов, особено по настапите и објавите на песни. Кога станува збор за провокацијата, јас сум жена што го изразува својот стил, став и креативност. И верувам дека секој има право на свој израз. На лошите коментари не им давам енергија.

Каква е Марија приватно? Што те прави среќна, а што те вади од такт?

– Приватно, јас сум многу емотивна личност. Се радувам на мали нешта, искрен гест, убав збор, мирно утро со кафе. Почесто плачам од среќа отколку од тага. Но, она што најмногу ме вади од такт се лицемерието и лагите, кога некој не е искрен, тоа веднаш го чувствувам и ме погодува. Сакам луѓе што се реални, чисти и топли.

Куманово е твојот роден град, колку тој влијаеше на твојот развој и приватно и во музиката?

– Куманово е мојот дом, мојата основа. Од таму носам вредности што ме водат низ животот, љубовта, почитта, скромноста. Тој град ми помогна да ги разберам луѓето, да ги почитувам разликите и да имам емпатија. Од музичка гледна точка, Куманово ми даде желба да сонувам поголеми соништа, да излезам од границите и да создавам без ограничувања. Тоа ми е мотив до ден-денес.