Потенцијалот на дигитализацијата во фармацевтската индустрија е со неограничени можности, но умешностa по која се издвојуваат гигантите е да ги препознаат моментот и брзата имплементација. Трансформацијата во „интелигентна компанија“ е цел која повеќе фармацевтски компании во регионот си ја поставија во изминативе две години под притисокот на пандемијата, но, оние поискусните го отпочнаа овој процес претходно, позиционирајќи се како лидери во регионот кои се во постојана потрага по иновации во производните процеси.

Фармацевтскиот регионален гигант Галеника прв ја прифати дигитализацијата како дел од активностите за модернизација и стана првата компанија во Централна и Источна Европа која го имплементира најсовремениот систем за управување со деловните процеси, за што во јуни 2021 година ја освои престижната награда „SAP Quality Awards“ CEE.

Со Даниел Јаневски, директор на претставништвото на Галеника во Македонија разговараме за улогата на дигитализацијата, промените кои таа ги носи, како и како влијае врз резултатите на Галеника во Македонија и регионот.

Што значи дигитализацијата за една фармацевтска компанија?

Јаневски: Дигиталната трансформација значи да се промени начинот на кој компанијата работи, односно се менува начинот на менаџирање на сите процеси, располагате со повеќе информации, овозможува побрзо да се прилагодувате на промените, односно навремено да ги менаџирате потребите и промените на пазарот. Слично како и во другите индустрии имате подобри информации и можете подобро да се позиционирате во бизнис опкружувањето. Галеника стратешки ја одбра трансформацијата како алатка за развој и можам да кажам дека значајно придонесе за компанијата да има подобра претстава што се очекувањата на потрошувачите. Што е најбитно за една компанија која е посветена на луѓето и верна на здравјето.

Во ноември 2017 година, Галеника стана дел од бразилската NC групација. Како оваа инвестиција влијаеше на иновативните процеси што се случија во Галеника?

Јаневски: Дигитализацијата во Галеника беше директен резултат на новите инвестиции и новата стратегија и визија на бразилскиот сопственик за понатамошен развој на компанијата. Односно, откако Галеника стана дел од NC групација, која ја вклучува и EMS – најголемата фармацевтска компанија во Бразил и една од најголемите фармацевтски компании во Латинска Америка, се претстави и новата стартегија која предвидуваше иновации, модернизација и реинвенција, а при тоа да се зачуваат вредностите кои компанијата веќе ги имаше на регионалните пазари – традицијата, довербата и квалитетот. Галеника е прва компанија во Централна и Источна Европа која го имплементира најсовремениот систем за управување со деловните процеси SAP S/4HANA Cloud, за што минатата година ја освои и престижната награда „SAP Quality Awards“ CEE. Значи ерата на иновации во Галеника е почната и оправдано компанијата расте како регионален лидер со амбиции да продолжи со својот интернационален раст. Имаме информации што очекуваат потрошувачите, инвестираме со иновации што не носат поблиску да се зацврстиме како нивен партнер. Дигитализацијата е процес што ќе продолжи согласно амбицијата да останеме први и навреме да ги имплементираме иновациите.

Што понатаму, како дигитализацијата се вклопува идните планови на Галеника?

Јаневски: Таргетот е понатамошна трансформација во „интелигентна компанија“. Досега со процесот на модернизација се имплементирани иновативни продажни платформи, како и Internet of Things во производните погони – односно платформа за паметно пратење на производните процеси што овозможи да се подигне и нивото на квалитетот во управување со процесите. Во тек е и проектот за Business Inteligence and Advanced Analytics платформата која помага да се добијат податоци за брзи и квалитетни стратешки и оперативни одлуки. Ја подобривме и комуникацијата меѓу вработените. Во секој случај дигитализацијата веќе ни овозможува да го напуштиме традиоционалниот пристап и да размислуваме дека лекот веќе не е една таблета, туку комбинација од традиција и современи алатки. Фармацијата и технологијата мора да работат заедно за да се извлече најмногу за пациентот. Дигитализацијата отвора можности за интеракција со потрошувачите или пациентите, што им носи поголема контрола и подобра информираност за заштита или превенција. Можностите се бројни, но да не заборавиме дека ова е една од најрегулираните индустрии на светот што влијае на сите процеси и во Галеника, иако дигитализацијата е препознаена како една од најважните алатки за креирање на нови вредности и решенија.

Производите на Галеника уживаат голема традиционална доверба во квалитетот на македонскиот пазар. Што понатаму?

Галеника беше и останува синоним за квалитет на нашиот пазар и тоа е резултат на ангажманот на сите вработени во компанијата, како и на тимот со кој работам. Се разбира успехот е само потврда дека можеме и подобро. Присутни сме со нашите производи во веледрогериите и аптеките, и се трудиме дополнително да ја подобриме таа достапност и со нови производи, за нашите потрошувачи во секое време да можат да го најдат она што им е потребно. Но, се трудиме да бидеме присутни во секојдневието на граѓаните и преку активности како корпоративно одговорна компанија да придонесеме со поддршка на културниот и спортскиот живот во државава.

Комерцијален ПР текст