Д-р Чипуровски, во клиничката болница „Жан Митрев“ и официјално почна со работа Центарот за офталмологија во соработка со Промедика офталмологија, уште една алка во сеопфатниот здравствен центар, кој отсега па натаму овозможува врвна и напредна грижа за очите. Што е она што го издвојува овој Центар од другите во земјава?

– Центарот за офталмологија, кој е резултат на соработката помеѓу Клиника „Жан Митрев“ и „Промедика офталмологија“, се издвојува како водечки центар во земјата бидејќи располага со најновата и најнапредната технологија за дијагностицирање и третман на очните проблеми во Македонија. Соработката меѓу две од најголемите и најискусните болници во земјата овозможува уникатен спој на долгогодишно искуство, знаење и експертиза, што резултира со пружање напредна грижа за пациентите што имаат потреба од офталмолошки услуги.

Каква технологија и апаратура се користи за дијагностика и третман на офталмолошките проблеми во „Жан Митрев“?

– Центарот користи најмодерна и најсофистицирана технологија за дијагностика и третман на офталмолошките проблеми, која вклучува апарати за високопрецизни дијагностички испитувања како ОЦТ, видно поле, ехо/АБ скен, тонометар за мерење очен притисок и рефракто-кератометар.

Кои видови прегледи и услуги се достапни во новиот офталмолошки центар?

– Пациентите може да направат офталмолошки преглед, супспецијалистички прегледи, ретинолошки преглед што е идеален за пациентите со дијабетес или ретинолошки заболувања, преглед за катаракта, преглед за глауком, преглед за окулопластика како и детски прегледи.

Кои се најчестите офталмолошки проблеми кај пациентите?

– Најчестите офталмолошки проблеми кај нашите пациенти вклучуваат рефрактивни грешки (какви што се кратковидост, далекувидост и астигматизам), катаракта, глауком, макуларна дегенерација, заболувања на ретината и на задниот сегмент на окото, како и различни видови очни инфекции и алергии. Нашиот офталмолошки центар нуди дијагноза и третман за сите овие состојби со најсовремена технологија.

Посебно внимание посветувате на децата. Што опфаќа офталмолошкиот преглед кај деца и на што треба да внимаваат родителите кога станува збор за видот на децата?

– Во нашиот центар, посветуваме посебно внимание и грижа на здравјето на очите кај децата, бидејќи навремената дијагноза на какви било очни проблеми е од клучно значење за нивниот правилен развој и учење. Секое дете заслужува јасен вид и затоа нашата цел е да се осигуриме дека сите деца добиваат најдобра можна грижа и дека евентуалните проблеми со видот се откриваат и третираат што е можно порано. Офталмолошкиот преглед кај децата во нашиот центар вклучува темелна процена на видната острина, проверка на очниот притисок, преглед на очното дно и детекција на можни рефрактивни грешки или други абнормалности. Нашиот тим работи внимателно и нежно за да го направи прегледот пријатен и безболен за секое дете.

Симптоми на кои родителите треба да внимаваат се: често трепкање, триење на очите, тешкотии во читањето или фокусирањето, двојна слика или нагло губење интерес за активности што бараат визуелна концентрација. Секој од овие знаци може да укажува на можен проблем со видот и е причина за консултација со офталмолог. Препорачливо е секое дете првиот офталмолошки преглед да го направи до неговата трета година. Ние сме тука да им помогнеме на родителите нивните дечиња да гледаат чисто со помагала или без.

Дијагностиката и третманот на катарактата, глаукомот и ретинолошките заболувања се само дел од услугите. Кои се другите офталмолошки заболувања што ги третирате во Центарот, а за кои пациентите може да побараат стручна помош?

– Покрај катарактата, глаукомот и ретинолошките заболувања, во нашиот центар дијагностицираме и третираме и други очни состојби, какви што се: рефрактивни грешки, инфекции на очните капаци, трауматски повреди на очите итн. Нашите пациенти можат да добијат комплетна дијагноза и соодветен третман за сите овие состојби.