Тајландските цариници уапсија шест индиски државјани поради обид да прошверцуваат од земјата десетици диви животни, вклучително и црвена панда и мајмун тамарин.

Полицајците пронашле 87 животни, вклучително и гуштери, птици и змии, спакувани во чекиран багаж на осомничените на аеродромот Суварнабхуми во Бангкок. Тие се обиделе да летаат за Мумбаи, пренесува Гардијан.

Тајланд е еден од главните светски центри за нелегален шверц на диви животни, транснационална трговија вредна повеќе милијарди долари, поради неговата богата биолошка разновидност, локација и инфраструктура. Шверцерите го користат Тајланд за транзит на животни кои ќе бидат продадени во Кина и Виетнам, а во последните години е забележан пораст на трговијата на животни во Индија.

„Дознавме дека меѓу животните има 29 гуштери со црно грло, 21 змија, 15 птици, вклучително и папагали – вкупно 87 животни. Животните биле скриени во багажот“, се вели во соопштението на царинската управа во средата.

Фотографиите објавени од одделот покажаа црвена панда – загрозен вид кој е со големина на домашна мачка, со тело налик на мечка – како ѕирка од плетената корпа.

Мајмун тамарин, кој е критично загрозен вид, според црвената листа на ИКУН, бил ставен во пластична кутија. Неколку змии и гуштери биле спакувани во платнени кеси.

Доколку бидат прогласени за виновни, осомничените може да се соочат со најмногу 10 години затвор или парична казна четири пати поголема од износот на увозните давачки.

Во февруари на истиот аеродром беше уапсен Монголец под сомнение дека се обидел да прошверцува комодо змејови, питони и повеќе од 20 живи риби надвор од Тајланд.