Имплант на вештачки бубрег може да ја трансформира иднината на трансплантациите
Во моментов, третманите за бубрежна инсуфициенција вклучуваат часови поминати приклучени на машина за дијализа или трансплантација од донатор – кои се ретки. Но, постои надеж за нова опција во не толку далечна иднина: имплант на вештачки бубрег, пишува „Саенс алерт“ (Sciencealert).
Препорачано
Научниците развија уред за биореактор кој користи човечки бубрежни клетки одгледувани во лабораторија и имитира некои од клучните функции на бубрегот. Успешно е тестиран кај свињи една недела без очигледни несакани ефекти или проблеми.
Тимот, предводен од Универзитетот во Калифорнија, Сан Франциско (UCSF), се надева дека нивниот уред може да се прилагоди за да вклучи поширок опсег на типови на бубрежни клетки и да биде поврзан со друг инструмент за филтрирање на отпадот од крвта.
„Фокусирани сме безбедно да ги реплицираме клучните функции на бубрегот. Биовештачкиот бубрег ќе го направи третманот за бубрежна болест поефективен, а исто така многу поподнослив и поудобен.“, вели биоинженерот Шуво Рој од Универзитетот во Калифорнија.
Повеќе од половина милион луѓе само во САД бараат третман на дијализа неколку пати неделно. Секоја година се вршат околу 25.000 трансплантации на бубрези , а тие често доаѓаат со тешки третмани со лекови за да се осигура дека новиот бубрег нема да биде отфрлен од телото.
Уредот, кој директно се поврзува со крвните садови и вените, е направен со култивирани човечки проксимални тубулни клетки, кои се одговорни за управување со нивото на вода и сол во телото и биле користени како тест случај во оваа студија. Овие клетки претходно покажале ветувачки резултати во лекување на бубрежна инсуфициенција кај човечки пациенти.
Научниците исто така се зафатени со разгледување на други опции, како што е одржливоста на трансплантација на животински органи на човечки пациенти. Без разлика каков е пристапот, целта е иста: да се спасат животите на оние со бубрежна инсуфициенција.
„Требаше да докажеме дека за функционален биореактор нема да бидат потребни имуносупресивни лекови, и тоа го направивме“, вели Рој. „Немавме никакви компликации и сега можеме сѐ да повториме, достигнувајќи го целиот панел на бубрежни функции на човечко ниво“.
