Десетици илјадници пропалестински демонстранти се собраа денеска на марш во центарот на Лондон, одбележувајќи една година од нападите во Израел на 7 октомври, јави британски Гардијан.

Утре во Хајд Парк треба да се одржи комеморативен настан, организиран од Одборот на пратеници на британските Евреи, Еврејскиот лидерски совет и други групи.

Активистите се собраа на плоштадот Бедфорд во услови на силно полициско присуство. Според организаторите, тие планирале да ги „таргетираат“ компаниите и институциите за кои велат дека се „соучесници во злосторствата на Израел“, вклучително банката Баркли и Британскиот музеј.

Полицијата соопшти дека пропалестинскиот марш наиде на контрапротести на крстосницата на Кингсвеј и Алдвич и  близу Странд и Трафалгар плоштадот.

Дел од демонстрантите носеа либански и ирански знамиња и транспаренти со натписи „Не поддржуваме геноцид“ и „Ционизмот е расизам“, додека мнозина скандираа „Слободна Палестина“.

Полицијата соопшти дека не очекува големи јавни собири в понеделник, на годишнината од нападот.