Се бројат деновите до почетокот на Европското првенство кое сите со нетрпение го очекуваме. Континенталниот собир ќе се одржи во повеќе европски градови во периодот од 11 јуни до 11 јули 2021 година.

Македонија ќе дебитира во групата „Ц“ во која се наоѓаат уште селекциите на Холандија, Украина и Австрија.

Својот прв натпревар избраниците на селекторот Игор Ангеловски ќе го имаат на 13 јуни во Букурешт против Австријците, четири дена подоцна во романскиот главен град ќе се соочат и со Украинците, а на 21 јуни во Амстердам ривали се Холанѓаните.

Селекторот Ангеловски веќе објави 26 имиња на кои ќе смета за настапот на ЕП.

Поранешниот репрезентативец на Македонија, Баже Илијоски верува и се надева дека нашата селекција ќе има што да каже и на овој голем настан.

– Нѐ очекува Европско првенство кое што е најбитно натпреварување во нашата историја. Ја мислам дека имаме квалитет и дека имаме големи шанси да се носиме со сите репрезентации и мислам дека ќе направиме добри резултати.

На едно вакво натпреварување пред сѐ треба да уживаме и да одиграме најдобро што знаеме, а резултатот сам по себе ќе си дојде. Јас верувам во селекторот и неговиот стручен штаб и знам дека ќе направиме добар резултат – ни изјави Илијоски.

ЕВРО 2020, Секуловски: Нема потреба Македонија да го менува пристапот!