Иако причините се веќе објавени, истрагата за смртта на актерот Џин Хекман и неговата сопруга Бетси Аракава продолжува.

Шерифот на округот Санта Фе, Адан Мендоза откри дека истрагата ќе остане активна додека не се решат сите отворени прашања во случајот.

„Ова го сметаме за отворена истрага додека не ги затвориме дупките во врска со мобилните телефони, додека не ги завршиме резултатите од обдукцијата на кучето и други недовршени работи што треба да ги решиме“, рече Мендоза.

Иако тој верува дека анализата на телефонот нема да открие нови информации за временската рамка на смртта, Мендоза сепак се надева дека комуникацијата на Бетси ќе открие дали таа се чувствувала лошо пред нејзината смрт. Познато е дека сопругата на Џин ги посетила пазарот и аптеката на денот на нејзината смрт.

За потсетување, Хекман и Бетси беа пронајдени мртви на 26-ти февруари во нивниот дом во Санта Фе. Резултатите од обдукцијата беа објавени една и пол недела подоцна и ја открија причината за смртта. Бетси најверојатно починала на 11-ти февруари од компликации предизвикани од хантавирусниот пулмонален синдром. Тоа е ретко, но сериозно заболување на дишните патишта кое се јавува по изложување на заразени глодари.

Според податоците снимени од пејсмејкерот на Хакман, се верува дека тој починал една недела подоцна, на 18-ти февруари. Актерот починал поради тешка срцева болест. Покрај тоа, тој бил во напредна фаза на Алцхајмерова болест. Неговиот пријател, Том Алин, неодамна изјави дека Хекман не можел да повика помош бидејќи немал мобилен телефон.