Американското Министерство за правда ќе му дозволи на актерот Мел Гибсон повторно да поседува оружје и покрај пресудата за семејно насилство во 2011 година, објави „Њујорк Тајмс“ во четвртокот, а адвокатката на одделот која се спротивстави на оваа одлука доби отказ.

Повикувајќи се на неименувани извори запознаени со одлуката на Министерството за правда, „Тајмс“ објави дека Гибсон кој е голем поддржувач на претседателот Доналд Трамп, е меѓу десетте лица на кои им се обновени правата да поседуваат оружје, иако федералниот закон им забранува на повеќето луѓе осудени за семејно насилство да го поседуваат истото.

Пред 14 години беше осуден на условна казна

Гибсон пред 14 години беше осуден од судија во Калифорнија на три години условна казна поради физичко насилство врз неговата тогашна девојка. „Тајмс“ објави дека прашањето за правото Гибсон повторно да поседува оружје предизвикало конфликт во Министерството за правда бидејќи адвокатката Елизабет Г. Ојер, минатиот месец одбила да му дозволи на актерот да му се вратат правата. Еден ден подоцна, таа беше отпуштена.

Во интервју за „Тајмс“, Ојер рече дека ѝ било кажано од висок функционер на Министерството за правда, дека правата за оружје на Гибсон треба да се обноват врз основа на фактот дека тој има личен однос со претседателот.

Г-ѓа Ојер рече дека нејзиното одбивање да се согласи со оваа наредба не била политичка одлука, туку истата е донесена врз основа на нејзиниот неуспех да спроведе истрага за случајот на Гибсон и затоа што ја сметала пресудата за семејно насилство крајно вознемирувачка.

Неколку дена пред неговата инаугурација во јануари, Трамп го именуваше Гибсон заедно со актерите Силвестер Сталоне и Џон Војт, за специјални амбасадори во Холивуд.