Новиот закон за амнестија ќе биде втор од пакетот што власта го „нуди“ на опозициската ВМРО-ДПМНЕ за таа да гласа за уставни измени, потврдуваат за „Слободен печат“ извори од власта. Но, за разлика од измените на Кривичниот законик, со кој драстично се намалуваат казните за злоупотреба на функцијата, за кои власта не барала гаранции, новиот закон за амнестија ќе се најде пред пратениците само ако ВМРО-ДПМНЕ даде гаранции дека ќе ги поддржат уставните измени. Според информациите, власта во новиот закон за амнестија ќе ги вклучи и осудените за изборен криминал и за злосторничко здружување ако опозицијата гласа за уставните измени.
Од власта брифираат дека ВМРО-ДПМНЕ барала новиот закон за амнестија да ги опфати и осудениците за „27 април“, и обвинетите за изборен криминал, односно да им се намали 30 отсто од казната. Ова би значело дека ако некој е осуден, на пример, на шест години затвор, по стапување на сила на законот ќе треба да одлежи околу четири години.

Новиот закон за амнестија најверојатно, наместо Министерството за правда, ќе оди пратениците, бидејќи министерот Кренар Лога се противи тој да биде предлагач на законот. Од друга страна, се остава простор пратеничките групи да се договорат и тие да бидат предлагачи на законското решение. Според информации на „Слободен печат“, можно е новиот закон за амнестија уште идната недела да биде испратен до пратениците.

Дека власта интензивно работи на обезбедување на двотретинско мнозинство за уставните измени, потврда е и експресното изгласување на измените на Кривичниот законик, иако официјално и власта и опозицијата негираат било каков договор.

Извори од власта брифираат дека Лога се противел на носењето на измените на Кривичниот законик и дека поради тоа, заменичката министерка за правда Викторија Мадиќ беше предлагач на законските измени. Според наши информации, два месеца траеле убедувањата Лога да биде предлагач на измените на КЗ, но дека позициите на министерот биле оти не може да биде потписник, зашто Алијанса за Албанците (АА) влегла во Владата заради уставните измени и заради борбата против криминалот и корупцијата. Токму поради тоа, ниту еден од пратениците на Алијанса за Албанците не гласале за измените на КЗ.

Дали ќе падне договор помеѓу власта и опозицијата за законот за амнестија допрва ќе се види. Инаку Министерството за правда уште во јули обелодени дека новиот закон за амнестија е готов и дека ќе се однесува за полесни кривични дела, а неговата цел е да се намали пренатрупаноста во затворите. Во објавата се тврдеше дека овој предлог начелно е прифатен од сите фактори и политички групи во земјата. ВМРО-ДПМНЕ тогаш рече дека Лога само ги информирал дека се подготвува закон, но не им го дал на увид.

Во меѓувреме не стивнуваат обвинувањата меѓу партиите за експресното гласање на измените на КЗ. ВМРО-ДПМНЕ обвинува дека СДСМ и ДУИ гласале за амнестија на своите криминали, а пратениците од Левица ги нарекоа фолиранти бидејќи, како што велат, не гласале „против“.
Интересен е листингот на гласање на пратениците. На седницата присуствувале 104 пратеници, од кои „за“ гласале 48, „против“ 36, еден бил воздржан, а дури 19 пратеници не гласале, иако биле дел од седницата. Единствениот воздржан е Мирослав Јовановиќ, претседател на Српската странка во Македонија, дел од владејачката коалиција. Не гласале седум пратеници од Алијансата, речиси целата пратеничка група на АА, пет пратеници на ВМРО-ДПМНЕ, како и Димитар Апасиев од Левица и Павле Трајанов од ДС. Не гласала ни претседателката на ЛДП, член на владејачката коалиција, Моника Зајкова и пратеникот од СДСМ, Ненад Коциќ. Другите тројца пратеници што не гласале се членови на Алтернатива, Демократско движење и Беса. Маја Морачанин, претседателка на ДОМ и член на владејачката коалиција, гласаше „против“.
Иако побаравме, до затворање на весникот не добивме одговор од Кабинетот на шефот на државата Стево Пендаровски дали ќе го потпише указот за измените на КЗ. Неофицијално, очекувањата на власта се дека Пендаровски ќе го потпише указот за законот. Платформата на граѓански организации за борба против корупцијата побара Пендаровски да го искористи уставно загарантираното право на вето и да не го потпише указот за прогласување на измените на КЗ.