Изолацијата за асимптоматските случаи на ковид-19 наскоро ќе се намали од 10 на 7 дена, дознава „Слободен печат“ од свои извори во Комисијата за заштита на населението од заразни болести, како и од Министерството за здравство. Деновиве ќе биде свикан состанок на Комисијата со дневен ред намалување на времетраењето на изолацијата, со оглед на тоа што омикрон варијантата на коронавирусот манифестира различни карактеристики отколку делта варијантата.

Комисијата за заразни болести во моментов нема да предложи измени за скратување на периодот на изолација, но се размислува во таа насока и на следниот состанок наредната седмица ќе се зборува во тој правец, велат од МЗ за Слободен печат.

Неофицијално, на два претходни состаноци на Комисијата за заразни болести, епидемиолозите и другите медицински професионалци се согласиле дека треба да има намалување на времето на изолацијата за асимптоматските случаи, меѓутоа, не од 10 на 5 туку од 10 на 7 дена.

Во САД, изолацијата за асимптоматските е намалена од 10 дена на 5 дена. Во земјава изолацијата најверојатно ќе трае 7 дена, затоа што уште има случаи заразени со делта варијантата на коронавирусот, коишто на петтиот ден се заразни и не би било епидемиолошки издржано толку рано да излезат од изолација.

Лекарите во земјава алармираа дека е потребно да дојде до намалување на временскиот период на изолацијата на ковид позитивните, поради појавата на омикрон варијантата. Поради фактот што оваа варијанта е позаразна, тие алармираа дека ќе трпи економијата.

Доктор Нико Беќаровски од Клиниката за токсикологија апелираше Комисијата за заразни болести да ги промени протоколите за изолација на контактите со заразените пациенти.

Ако уште утре не ги смените протоколите и не го намалите времето на изолација на позитивните, на 10 јануари ќе нема кој да работи во државата и сите ќе бидеме во изолација. Изолација на контактите при вака раширен омикрон е неодржива и без епидемиолошка оправданост, вели доктор Беќаровски.

Според неговите проценки, доколку вчера имаше 1.197 позитивни со регуларно направени тестови, сигурно има уште повеќе од 5 илјади граѓани кои се самотестирани и повеќе од 25 илјади граѓани кои се позитивни, а недијагностицирани.

Добрата вест е што до крајот на февруари ќе направиме колективен имунитет и за 8 март пак ќе може да играте на чочеци, напиша доктор Беќаровски на Фејсбук.

Инаку, според сегашните протоколи за изолација, оние кои се позитивни на коронавирусот, а се асимптоматски, во изолација остануваат 10 дена, додека позитивните со симптоми 20 дена.