Норвешка пријави појава на високо патогениот вирус на птичји грип Х5Н1 на фарма за живина во општината Хадсел во округот Нордсал, објави во вторник Светската организација за здравје на животните (ВОАХ), при што податоците сигнализираат ширење на болеста во Европа на прагот на есента. Вирусот Х5Н1 беше откриен во јато од 7.500 живина и уби 500 птици, објави ВОАХ со седиште во Париз, повикувајќи се на извештај од норвешките власти.

Само во последните две недели, вирусот на птичји грип е регистриран и во Германија, Португалија и Бугарија. Кон средината на јули, болеста се појави и на фарма за мисирки во Шпанија. Птичјиот грип обично се шири меѓу живината во Европа на почетокот на есента, потсетува Ројтерс. Птичјиот грип значително ја зголеми цената на јајцата во Европската Унија, кои во вториот квартал беа за 27,8 проценти повисоки во однос на истиот период минатата година, според пресметките објавени денес од Евростат.

Во првите три месеци од оваа година, цените беа повисоки за 10,7 проценти. Владите и одгледувачите на живина стравуваат од ширење на болеста, која во последните години ги опустоши стадата низ целиот свет, прекинувајќи го снабдувањето и зголемувајќи ги цените на храната, со зголемен ризик од пренесување на луѓето, пренесува „СЕЕ.биз.еу“.