Ниту „брзи и кратки“ измени ќе се прават на Кривичниот законик како што најавуваше министерот за правда Игор Филков, ниту Собранието ќе ги менува спорните измени како што побара Уставниот суд, па по сите перипетии и најави дека ќе се вратат високите казни за функционерите, најверојатно ќе се чека новиот Кривичен законик што го подготвува работната група.

И овие измени, како и измените на други клучни закони ќе се прават по локалните избори, иако за да се смени Кривичен не треба Бадинтерово мнозинство, кое беше изговор за измените на другите закони.

Уставниот суд му даде шанса плус на Собранието, Собранието ја завршило својата работа, но предлог – измените биле во Влада, а Владата од одговорот што го добивме оттаму вели дека ќе го чека новиот Кривичен законик.

– Од страна на Министерството за правда е формирана работна група која работи на нов Предлог на Кривичниот законик. Во тек е постапката, се остваруваат работни средби со сите засегнати страни и процесот на изработка е во тек. Како Влада остануваме со силен фокус на реформите во правосудството, нашата цел е да се креираат решенија кои се одржливи и направени преку инклузивен процес. Владата останува посветена на усогласување на Кривичниот законик со европските и меѓународните стандарди – велат од Владата за „Слободен печат“.

Иако од февруари кога Уставен се закани со укинувачка или поништувачка одлука за контроверзните измени, поминаа шест месеци, рок што му го даде Уставен на Собранието да ги смени спорните измени, ниту Собранието ги смени, ниту пак Уставен ги „реши“. Собранието ја завршило својата работа, а претседателот на Уставниот суд Дарко Костадиновски писмено ќе му се обрател на собранискиот спикер Африм Гаши.

– Во рамки на Собранието е формирана работна група за разгледување и постапување по Решението на Уставниот суд на Република Северна Македонија по однос на спорните измени на КЗ од септември 2023 год. Работната група во Собранието ја заврши својата работа и ги достави до Владата. Во моментов, понатамошната постапка е во надлежност на работната група во рамки на Владата. Имавме најави дека се наоѓаат во завршна фаза, но досега предлог-измените не се доставени до Собранието – велат од Собранието за „Слободен печат“.

Од Уставен, иако на седницата Костадиновски кажа „му даваме уште една шанса на Собранието да се коригира, да се согласи со нашите стојалишта, во случај да не го стори тоа ќе следува укинувачка или поништувачка одлука од Уставниот суд“, сега велат дека ќе чекаат одговор од Собранието.

Мнозинството уставни судии ги оспорија измените на Кривичниот законик

– Претседателот на Уставниот суд Дарко Костадиновски е во комуникација со претседателот на Собранието Африм Гаши и писмено ќе се обрати до Собранието за да добие официјална информација во врска со определениот рок од 6 месеци и насоките за усогласување на законот, дадени од Уставниот суд. Врз основа на одговорот од Собранието, Судот ќе ги преземе понатамошните чекори за постапување во овој предмет – изјавија од Уставниот суд за „Слободен печат“.

Додека овие пробни измени се шетаат низ институциите, не се готови ниту измените на Кривичниот законик „брзи и кратки“ како што ги најавуваше Игор Филков, ниту пак новиот Кривичен законик кој со години го подготвуваше работна група.

„Брзите и кратки“ измени се заглавени на доусогласување на Правда со МВР за кривично дело „Безобѕирно управување со моторно возило“, измени кои се поврзани со имплементацијата на „Сејф сити“, најавени за почетокот на следната година.

– Во моментов се работи на доусогласување со МВР околу одредени прашања, вклучително и кривичното дело „Безобѕирно управување со моторно возило“, по што измените ќе влезат во владина процедура – велат од Правда.

Кривичниот законик пак на работната група со месеци чекаше мислење од Европската комисија, а според нашите информации тој е готов и треба да се направат само измени на кореспондентните табели по насоки на Европската Унија. Кога ќе се усогласат „брзите“ измени со МВР нема временска рамка, па нив може да ги престигне и новиот Кривичен законик кој се најавува за крајот на годинава.

Последиците од измените на Кривичниот законик се најдоа и во Годишниот извештај на Европската комисија за владеење на правото за 2025 година. Иако беа донесени во 2023 година и „уништија“ многу постапки против високи функционери, сè уште се чувствуваат, а и покрај најавите за негови измени, сè уште нема исход.

Правда подготвила нов Кривичен законик, испратен е на мислење во Брисел

Со овие измени голем дел од случаите што ги водеше Јавното обвинителство за гонење организиран криминал и корупција се префрлија во основните јавни обвинителства каде што „недоволната специјализација и недостатокот на ресурси може да го попречат ефикасното гонење на вакви кривични дела“. Пониските казни за сторителите на корупција и правната несигурност што ја предизвикаа измените, дополнително придонесоа за чувство на неказнивост. Како што стоеше во извештајот, измените имаат рок да се донесат до декември 2025 година.

Измени најавуваше и премиерот Христијан Мицкоски кој констатираше дека штетата од спорните измени нема да се поправи.

Штетите од спорните измени не може да се поправат, но нема ни волја да се вратат старите казни, па сите функционери фатени во криминал ќе се гонат по одредбите од стариот Кривичен, додека пак обвинителството се соочува со брзо застарување на делата поради намалените казни.