Карневалските прослави во Рио де Жанеиро започнаа во саботата, а десетици кучиња облечени како сирени, суперхерои, пеперутки и кловнови продефилираа заедно со нивните сопственици на една од најпопуларните улични забави за кучиња во градот, пишува „Асошиејтед прес“.

„Блокао“ – игра на зборови, составена од „блоко“, што се однесува на карневалски улични забави, и „као“, што се однесува на куче на португалски – собра над 200 луѓе во населбата на плажата Бара де Тијука во Рио во саботата наутро.

Кучињата, од сите големини и раси, биле претставени на мала бина на средината на плоштадот.

Па, така, чивавата Алана била облечена како блескава сирена, кокер шпаниелот Тринде како Хермиона во наметка и шицуто Биду како крзнен Супермен.

Пакока, двегодишно јазовичарче со 100.000 следбеници на Инстаграм, парадираше како хот-дог – ставен во „лепче“ и прелиен со „кечап“ и „сенф“.

„Тој е инфлуенсер“, изјави неговата сопственичка Хелена Рибеиро (32), која носела црвена кошула со етикета за кечап на „Хајнц“. Костимот на Пакока, рече таа, бил инспириран од неговата раса.

Родриго Пирола и Сесилија Миреле пристигнале на карневалот облечени како Фред и Вилма Флинстон, облека која ѝ одговарала на четиригодишната Амора, која носела портокалов фустан.

„Амора е наша ќерка, ние сме семејство. Секаде одиме заедно. Сите овде се лудо вљубени во кучиња“, изјави Миреле за Асошиетед прес.

Каролина Едуардо (27) ја облече својата 13-годишна миленичка Ребека во костим на Снежана, прикачувајќи темна сјајна перика меѓу нејзините уши како „јаготка на шлагот“.

По натпреварот во костими, љубителите на кучињата и нивните миленици танцувале во ритамот на бразилските поп класици.