Ќе ги искориостиме сите можни механизми за да предизвикаме што поскоро да се оддржат предвремени парламентарни избори, велат од опозициската Беса за „Слободен печат“. И партијата предводена од Билал Касами најавува опозициска блокада на парламентот откако лидерот на ВМРО-ДПМНЕ Христијан Мицкоски најави дека преку филибастеринг и амандмани ќе ја закочат работата на Собранието за да издејствуваат предвремени парламентарни избори.

– Ставот на Беса е многу јасен и го повторуваме неколку месеци. Легитимитетот на Владата е спорен бидејќи мнозинството е направено преку уценувани пратеници и политички партии кои преку ноќ од критичари на власта станаа дел од Владата. Ваквиот состав на Владата рефлектира и лошо управување со сите институции, затоа е многу битно ден побрзо да имаме парламентарни избори, легитимнитетот да се врати на граѓаните и тие да одлучат за тоа кој треба да ги претставува. Ние ќе ги искористиме сите можни механизми за да предизвикаме предвремени парламентарни избори што побрзо – велат од Беса.

Извршниот комитет на ВМРО-ДПМНЕ на предлог на претседателот Мицкоски вечерва треба да одлучува за активна блокада на Собранието за да издејствува дијалог и предвремени избори откако премиерот Димитар Ковачевски веќе неколку пати одби средба со лидерот на опозициската партија условена со датум за избори.