Студентите, кои повеќе од два месеци блокираа околу 60 факултети во Србија поради трагедијата на железничката станица во Нови Сад, во понеделникот започнаа 24-часовна блокада на Автокоманда – еден од најважните патишта во Белград. Блокадата завршува во вторник во 10 часот.

Многу познати личности од целиот регион ги поддржуваат студентите во нивните цели, меѓу кои и Момчило Бајагиќ-Бајага. Тој со бендот јасно ја изрази својата поддршка, па на официјалниот фејсбук-профил информираа дека ги откажуваат сите закажани концерти.

„Секако дека ги поддржувам студентите и сите нивни оправдани барања. Се надевам дека овие барања ќе бидат исполнети што е можно поскоро, што би било добро за сите нас. Нашиот бенд „Бајага и инструктори“ одлучи да ги откаже сите концертни активности до понатамошно известување“, се вели во објавата на Фејсбук.

Да потсетиме, блокадата на Автокоманда во Белград следи по генералниот штрајк што се одржа во петокот во Србија. Студенти и други граѓани учествуваа во протестните прошетки. На штрајкот се приклучија и медиумите, бројни синдикати, наставници, професори, лекари, адвокати, средношколци, земјоделци…