Бунтовнилките Хути во Јемен денеска соопштија дека извршиле напад, четврти во последните 72 часа, врз американскиот носач на авиони УСС Хари Труман во Црвеното Море, како одмазда за новата серија американски бомбардирања во областите на земјата што ја контролираат.

Хутите „откриле непријателски воени движења во Црвеното Море како подготовка за лансирање на нов голем воздушен напад против нашата земја“, изјави портпаролот на групата преку Телеграм.

Како одмазда, продолжи тој, движењето лансираше крстосувачки ракети и беспилотни летала против носачот на авиони и други воени бродови, што „дозволи овој напад да пропадне“.

Американската војска во оваа фаза не реагира на преземањето на одговорноста.

Претходно, медиумите блиски до движењето Хути објавија за нови американски напади врз различни области под контрола на бунтовниците.

Од своја страна, Здружената команда на САД одговорна за регионот на Блискиот Исток (CENTCOM, „централна команда“) зборуваше преку Икс за „континуирани операции против терористите Хути поддржани од Иран“ , без дополнително појаснување.

„Американскиот удар“ беше насочен кон провинцијата Саада, според новинската агенција САБА, контролирана од движењето, и телевизиската мрежа Ал-Масира, исто така поврзана со бунтовниците.

Очевидци изјавија за агенцијата Франс прес за најмалку три бомбашки напади во Саада. Ал Масира кратко време подоцна објави уште четири напади врз упориштето на Хутите.

Претходно вчера, Хутите ја презедоа одговорноста за нападот врз „базата Неватим“ во пустината Негев, јужен Израел, велејќи дека користеле хиперсонична балистичка ракета „Палестина 2“. Од своја страна, израелските вооружени сили објавија дека „пресретнале“ проектил лансиран од Јемен. Сирените за тревога се огласија во неколку градови во јужен Израел.

Ова беше прв напад на израелска територија од јеменска територија откако на 19 јануари стапи на сила прекинот на огнот во Појасот Газа. Тоа уследи по серијата масовни израелски воздушни напади врз палестинската енклава во раните утрински часови вчера, при што загинаа над 400 луѓе.

Хутите, кои се блиски до Техеран, ги осудија смртоносните воздушни напади и ветија понатамошна ескалација. Исто така неодамна се заканија дека ќе продолжат со нападите врз бродовите за кои велат дека се поврзани со Израел во Црвеното Море.

„Го осудуваме продолжувањето на нападот на ционистичкиот непријател врз Појасот Газа и гаѓањето на невооружени цивили“, се вели во соопштението на Врховниот политички совет на движењето.

Хутите „ќе ги интензивираат своите воени операции против ционистичкиот непријател сè додека не запре варварскиот напад врз Газа и не биде укината блокадата“ на енклавата, додаде нивниот портпарол преку Телеграм.

Вчерашните израелски бомбардирања резултираа со смрт на најмалку 413 лица во Појасот Газа, според најновите податоци на Министерството за здравство на владата на Хамас.

Околу еден месец по избувнувањето на војната во Појасот Газа, предизвикана од невидениот упад на Хамас на јужна израелска територија на 7 октомври 2023 година, Хутите започнаа со ракетни и беспилотни напади против Израел и против бродови за кои рекоа дека се поврзани со него, нагласувајќи дека тие дејствуваат во знак на солидарност со Палестинците.

Американскиот претседател Доналд Трамп во саботата најави воздушни напади врз упориштата на Хутите во Јемен. Во бомбашките напади во Сана и на други места загинаа 53 лица, а 98 беа ранети, соопштија Хутите. Многу водачи на шиитските бунтовници беа убиени, уверуваше од своја страна американската влада.