Хрватската Влада го усвои деветтиот пакет мерки за помош на граѓаните и економијата, во вредност од 175,4 милиони евра, кој вклучува и постепено излегување од мерките за субвенционирање на енергијата, т.е. електрична енергија, гас и топлинска енергија. 115 милиони евра ќе бидат издвоени за прифатлива енергија, т.е. електрична енергија, гас и централно греење, 50,9 милиони евра ќе бидат издвоени за надомест на трошоците за енергија за ранливите енергетски потрошувачи, осум милиони евра за студентска поддршка и 1,5 милиони евра за надомест на невработените хрватски ветерани.

Пакетот го презентираше премиерот Андреј Пленковиќ, опишувајќи го како „сеопфатен и соодветен“ во овој момент. Тој истакна дека постепеното олеснување и излегување од мерките за субвенции се спроведува бидејќи цените на енергијата на пазарот се стабилизираа, при што Хрватска излезе од мерките како и другите земји од ЕУ. Со претходното замрзнување на цените, просечната сметка за електрична енергија од 50 евра месечно е намалена за 18,7 проценти, на 40,65 евра, што значеше годишна заштеда од 112 евра по домаќинство, информира Н1 Хрватска. По 1 ноември 2025 година, сметката од 40,65 евра ќе се зголеми на просек од 43,65 евра, или 7,41 проценти. Од 1 јануари 2026 година, според Пленковиќ, „кога ќе се додадат акцизите“, просекот ќе биде 45,61 евра, со зголемување од 4,8 проценти.

„Сепак, поентата е дека продолжуваме со субвенционирање, наместо 50 евра, ќе биде 45,61 евра, што е сепак 4,4 евра поевтино од она што би било на пазарот“, истакна Пленковиќ. Овие мерки важат за сите домаќинства, како и за јавниот и непрофитниот сектор, како што се градинки, училишта, домови за стари и хендикепирани лица, верски заедници итн.