Законската рамка потребна за воведување задолжителна воена служба треба да биде претставена во јуни, а усвоена во Собранието во октомври годинава. Тоа значи дека обуката на првите регрути во касарните во Книн, Слуњ и Пожега ќе започне кон крајот на оваа или најдоцна на почетокот на следната година, јавува агенцијата Хина.

Веќе се е подготвено за почеток на обуката во споменатите касарни, но неопходно е да се промени законската рамка со воведување задолжителна основна воена обука.

Овие измени ќе бидат усвоени во текот на годината.

План за активности и законски измени

Премиерот Андреј Пленковиќ претходно оваа недела имаше средба со министрите за одбрана, за внатрешни работи и за надворешни работи, како и со претставници на вооружените сили. Тогаш до претседателот Зоран Милановиќ беа испратени два документа – нацрти на Стратегијата за одбрана и Долгорочниот план за развој на вооружените сили – со предлог за нив да се расправа на седница на Советот за одбрана.

Договорено е и акционен план за измена на Законот за одбрана и Законот за служба во вооружените сили, со што повторно ќе се воведе задолжителен воен рок. Планот е предлог-законите да се достават на јавна расправа во јуни, првото читање да се одржи до летниот распуст (до 15 јули), второто во септември, а конечното усвојување во октомври.

Први регрути на крајот на годината

„Првите регрути ќе започнат со обука во касарната кон крајот на оваа година или почетокот на следната година“, ѝ беше кажано на Хина.

Задолжителната основна воена обука ќе трае два месеци, а регрутите ќе добиваат 1.100 евра нето месечно, со обезбедено сместување и храна. Обуката ќе се смета за работно искуство и ќе биде предност за вработување во државните и јавните служби – што треба да биде мотивирачки фактор за младите.

Вработените кои ќе бидат на обука нема да смеат да бидат отпуштени, а студентите ќе можат да го одложат служењето до крајот на студирањето, но најдоцна до 29-тата година од животот.

Алтернатива за оние кои одбиваат

Ќе бидат обезбедени две алтернативи за оние кои одбиваат да служат во војска:

Тримесечна обука преку системот за цивилна заштита, за дејствување во кризни ситуации како пожари, поплави или земјотреси.
Четиримесечна работа за локалната самоуправа (општина, град или жупанија) на комунална работа, осум часа дневно.
Надоместокот за овие алтернативи ќе биде значително помал, а деталите се уште не се целосно дефинирани.

Државата планира да објавува пет повици за основна воена обука годишно, со 800 регрути по повик – што значи вкупно 4.000 регрути годишно.