43-годишна жена од хрватскиот град Метковиќ е уапсена и сместена во притвор откако му ставила лек во кафето на својот 20 години постар сопруг, со намера да го убие.

Според локалните медиуми, осомничената ставила десет таблети „апаурин“ од по десет милиграми во кафето на 64-годишниот сопруг. Апаурин е едно од бренд-имињата на бензодиазепинскиот лек кај нас најпознат како дијазепам.

Човекот, несвесен за опасноста, го испил кафето, по што набргу му се слошило и побарал лекарска помош. Според информациите, тој почувствувал слабост и побарал прва помош, по што итно бил пренесен во Општата болница во Дубровник, каде му бил испумпан желудникот. Тој потоа бил пуштен на домашно лекување.

Со кривичната истрага е утврдено дека 43-годишната жена сторила кривично дело убиство во обид.

Жената во понеделникот вечерта со кривична пријава била предадена на притворскиот надзорник, а денеска била спроведена кај истражен судија, по што судија ѝ одредил притвор.