Службениот весник не е само хроничар на државноста, туку и последниот филтер за сите прописи кои се објавуваат во државата, своевиден гарант за нашата правна сигурност или според мотото со кое вчера беше прославен нивниот 80-годишен јубилеј -„Правник кој знае се“. Во овие осум децении од нивната печатница излегоа 8.000 изданија, а на годишно ниво се издаваат по 300 броја, рече директорот Владимир Кроневски.

-На 18 феруари 1945 година, Президиумот на АСНОМ донесе Одлука за издавање на „Службен лист на Федералната единица Македонија“, за што е формирана првата редакција, која со Владата на НР Македонија се трансформира во стопанско претпријкатие од републичко значење, односно претпријатието Службен весник на Народна Република Македонија. Весникот до 2002-та се печатеше на македонски јазик, а од таа година и на ддругите јазици кои ги зборуваат 20 отсто од граѓаните. Од 2003-та стартуваше и електронското издание, со најсовремена информатичка опрема, а во 2012-та почна дигитализацијата на неговите изданија од 1945 година. За олеснување и на граѓаните со оштетен вид од 2018 година, Службен весник се издава и на Браево писмо – рече Кроневски.

Оттука 80-годишниот јубилеј сведочи за историјата на нашата држава, за сите важни историски акти и документи, а од своето основање до денес, ова претпријатие претставува темел за правната сигурност, извор на официјалната вистина и гарант на транспарентноста во донесувањето и примената на законите.

-Во чекор со времето и побарувањата на современиот свет, нашата идна цел е целосната дигитализација на базата на податоци и целосно исфрлање на хартијата, што ќе придонесе и во заштитата на човековата околина – подвлече Кроневски.