Неименувана жена во Холандија била касната двапати за ногата од животно, за кое се верува дека е волк, додека џогирала во националниот парк Хоге Велуве, соопштија претставници на провинцијата Гелдерланд.

Peter helpt hardloopster nadat ze door #wolf is gebeten: ‘Ze is aangevallen naar dat ze voor schrik was gevallen.’ een kritieke situatie die om aandacht vraagt. https://t.co/JG8UlLtepG

— Platform Wolf en Nederland (@PlatformWeN) April 14, 2025

Случајни минувачи го избркале животното кое ја нападнало жената, која по инцидентот во неделата попладне била пренесена во болница.

Беа собрани примероци од ДНК за да се потврди дали волк е одговорен за нападот, а резултатите се уште се чекаат, пишува „НЛ Тајмс“ (NL Times).

„Разговараме со општината Еде и Националниот парк Хоге Велуве и подготвуваме чекори во случај истиот волк повторно да покаже вакво однесување“, соопшти провинцијата Гелдерланд.

Во јули 2024 година, беше пријавено дека петгодишно девојче било каснато од волк на имотот Ден Трек во Леусден, што доведе до делумно затворање на областа речиси еден месец.

Волците се вратија во Холандија во 2015 година по повеќе од еден век и се заштитени со европските закони.

Сепак, некои земјоделски организации и владини претставници изразија загриженост за брзото зголемување на популацијата на волците и се залагаат за регулаторни мерки, вклучително и потенцијално уништување на волците кои претставуваат закана за добитокот.