Генералниот секретар на партијата Беса, Арјанит Хоџа, побара да се исклучи осветлувањето на Милениумскиот крст на врвот на Водно, по примерот на одлуката на градските власти во Париз да го ограничат осветлувањето на Ајфеловата кула, поради енергетската криза.

„Во Париз е донесена одлука за намалување на осветлувањето на Ајфеловата кула, со што се заштедуваат непотребни трошоци за струја, особено во периодот на енергетската криза која започна и се очекува да се продлабочи оваа зима. Наместо нашите лидери да ни кажуваат како да се користи струјата во домаќинствата, јас јавно предлагам да почнат да штедат и да го прекинат непотребното осветлување на Милениумскиот крст на Водно, Скопје!“, напиша Хоџа на Фејсбук.

Партијата на Хоџа до лани беше дел од Владата, а тој беше министер за земјоделство, сѐ додека Беса не ја напушти владината коалиција и не почна да делува како опозициска партија.