Како што температурите сè почесто се искачуваат над 30 степени, станува јасно дека летото ни е пред врата. Жештините не нè тераат само да бараме засолниште во сенка, туку често влијаат и врз нашиот апетит. Наместо да избереме лесна и здрава храна, понекогаш го прескокнуваме оброкот или посегнуваме по првата работа што ни доаѓа при рака, што обично не е најдобрата опција, пишува „Живим“.

За да избегнете такви импулсивни избори, ви предлагаме два едноставни и вкусни рецепти за летни напитоци – едниот со освежителен вкус на шумско овошје, а другиот со егзотична нота на ананас. Брзи се за подготовка, богати со вкус и совршени за разладување, без разлика дали сте дома или на работа.

Смути со шумско овошје
Потребни состојки:

• 250 г боровници или друго шумско овошје
• 1 банана
• 250 мл јогурт

Подготовка:

Ставете ги сите состојки во блендер и миксирајте додека не добиете кремаста, густа смеса.

Совет: Оладете го овошјето и јогуртот пред употреба или додадете неколку коцки мраз за дополнителна свежина.

Лимонада со ананас и лимета

Потребни состојки:

• 1/2 шолја шеќер (или еритритол како поздрава замена)
• 1 шолја свежо исцеден сок од лимон
• 1 шолја сок од ананас (може да го подготвите во блендер)
• 2 лажици сок од лимета
• 5 шолји вода

Подготовка:

Во мало тенџере измешајте шеќер и една шолја вода, загревајте на умерен оган додека шеќерот не се стопи. Тргнете го сирупот од оган и оставете да се излади. Потоа, во голем бокал измешајте го изладениот сируп со соковите и додадете пет шолји вода. Послужете го напитокот ладен, со мраз по желба.

Овие природни и разладувачки напитоци се совршен начин да се освежите во летните денови и да му дадете на телото нешто хранливо и вкусно.