Високи нивоа на хемикалијата бензен што предизвикува рак се пронајдени во некои производи за акни од брендови вклучувајќи „Есте Лодер“, „Клиник“ и „Таргет“ (Estee Lauder’s, Clinique’s, Target’s), соопшти независната американска лабораторија „Валишур“ (Valisure).

Лабораторијата во Њу Хевн, Конектикат, исто така, поднесе петиција до американската Администрација за храна и лекови, барајќи од регулаторот да ги повлече производите, да спроведе истрага и да ги ревидира индустриските упатства, пренесува Ројтерс.

Бензенот, кој веќе е пронајден во одредени кремови за сончање и суви шампони, би можел да се формира на „неприфатливо високи нивоа“ и во производите за лекување на акни со бензоил пероксид што се издаваат на рецепт и без рецепт, навеле од лабораторијата „Valisure“.

Акциите на „Есте Лодер“ паднаа за 3 отсто по извештајот.

„Таргет“ и „Есте Лодер“ не одговориле на барањето за коментар на Ројтерс.

Високи нивоа на бензен беа откриени не само во тестираните производи против акни, туку и во воздухот околу инкубираните производи, што укажува дека канцерогената материја може да протече од некои пакувања, што претставува потенцијален ризик од вдишување, навеле од лабораторијата „Валисур“.