Претседателот на Алијансата за иднината на Косово, Рамуш Харадинај, го обвини косовскиот премиер Албин Курти дека им дава неограничени овластувања на своите послушници и дека тие се заеднички одговорни за нивото на корупција, што, како што посочува, е на највисоко ниво во историјата на Косово.

Харадинај смета дека поради бројните афери и носење одлуки без координација со меѓународната заедница, Самоопределување ќе пропадне на претстојните парламентарни избори.

– Корупција, за жал, никогаш немало повеќе од сега. Курти им даде неограничени овластувања на своите пријатели, неговите следбеници и послушници, знаев дека ќе биде вака. Курти е шеф на корупцијата и е одговорен за сите лоши работи што се случуваат – изјави Харадинај за „Економија онлајн“.

Харадинај тврди дека, доколку дојде на власт, ќе направи пресврт и ќе ја промени иднината на Косово. Целта на АБК, како што вели, е членство на Косово во НАТО.

Членството во НАТО за Харадинај претставува важен чекор во напредокот на Косово кон интеграција, економски развој и капитални инвестиции.

Членството ја отвора перспективата за инвестирање и развој и ни овозможува побрзо да се движиме во развиениот свет. Во овој случај, граѓаните и младите остануваат во Косово и нема потреба да ја напуштат земјата. Ќе се промени и состојбата во здравството, образованието и одбраната. Пред нас се изборите кои се пресвртница – заклучи Харадинај.