Утрово во Клиничкиот центар „Мајка Тереза“ владее вистински хаос – пациентите сведочат дека системот на издавање броеви е заглавен, термините не се исполнуваат, а дел од пациентите се враќаат назад без да добијат лекарска услуга. Луѓе, кои дошле на празен стомак за крвна слика — меѓу кои има и трудници — чекаат со часови во редици и се жалат дека персоналот не дава доволно информации.

Системот „Мој термин“ не функционира, тврдат пациенти за „Слободен печат“. Некои пациенти тврдат дека проблемот со системот трае веќе неколку дена.

— Чекав цел ден. Имав број 91, стигнаа до број 30, кога престанаа да работат. Сите се напикаа на шалтериве за да прашуваат, јас се откажав и си заминав — кажува изреволтиран пациент за „Слободен печат“.

Директорот на „Мој термин“, Фикрет Шабани, за „Слободен печат“ вели дека системот денеска работи, но е бавен. Тој истакна дека претходните денови функционирал без проблем, но на секој почеток на месец системот е преоптоварен поради зголемен внес на податоци.

— Чекаме одговор од ИТ техничарите од ФИНКИ за да дознаеме дали станува збор за инцидент или за хардверски проблем. Системот е стар 10 години, годишно се внесуваат од 20 до 40 милиони рецепти и околу 12 милиони упати. Инфраструктурата е застарена, но за еден до два месеца целиот систем ќе биде префрлен во новиот дата-центар, што ќе овозможи хардверски и софтверски подобрувања — изјави Шабани.

Сепак, додека институциите чекаат техничко решение, пациентите остануваат заробени во редици, нервозни и револтирани што не можат да добијат навремена услуга.

Слободен печат го исконтактира Министерството за здравство за коментар и дополнителни информации, но до објавувањето на текстот не добивме навремен одговор.