Седумкратниот светски шампион во Формула 1, Луис Хамилтон, изјави дека неговите борби и проблеми во Ферари ќе бидат болни и ќе траат до крајот на сезоната, по, како што рече, ужасната трка на Големата награда на Саудиска Арабија.

Хамилтон ја започна и заврши трката во Џеда на седмото место, 30 секунди зад тимскиот колега Шарл Леклер, кој го освои третото место, зад победникот Оскар Пјастри од Мекларен и второпласираниот Макс Верстапен од Ред Бул.

– Не можам да земам ништо позитивно од тоа, освен што Леклер заврши на подиумот, што е одлично за тимот. Беше ужасно, воопшто не пријатно. Само се лизгав наоколу. Немаше спојување, во втората промена на гумата има малку подобра рамнотежа, но сепак немаше темпо. Прилично лошо – изјави Хамилтон, а пренесува Скај.

Откако победи на спринт трката во Кина минатиот месец, Хамилтон не беше подобар од својот тимски колега во квалификациите во Јапонија, Бахреин и Саудиска Арабија.

– Во моментов нема решение. Вака ќе биде до крајот на годината. Ќе биде болно – додаде Хамилтон, рекордер по број на победи – 105 и пол позиции – 104 во Формула 1.

Оваа година, по 12 години во Мерцедес, Хамилтон се пресели во Ферари и мора да се навикне на нов болид и поинаков стил на возење. Шампионатот во Формула 1 продолжува на 4 мај со Големата награда на Мајами, САД.

Пјастри победи во Џеда и го презема врвот