Палестинската милитантна група Хамас соопшти дека не добила никакви нови предлози за прекин на огнот во Газа откако елементи од планот од 21 точка на американскиот претседател Доналд Трамп за прекин на војната и ослободување на заложниците беа презентирани на медијаторите и се појавија во медиумите.

Во соопштението на Хамас, кое денеска го објави „Тајмс оф Израел“, се наведува дека преговорите се прекинати од 9 септември, кога Израел изврши напад во Катар врз зградата каде што лидерите на таа група одржуваа состанок.

Хамас додаде дека се подготвени да го разгледаат секој предлог доставен до нив преку медијатори, позитивно и одговорно, на начин што ги штити правата на палестинскиот народ.

Минатата недела, САД споделија план за прекин на војната во Газа со неколку арапски и муслимански земји на маргините на Генералното собрание на Обединетите нации.

Трамп потоа рече дека „сите земји во регионот се вклучени, Хамас е многу свесен за овие дискусии, а Израел е информиран на сите нивоа“.