Пред 10.000 години, група тинејџери во денешна Шведска џвакале парчиња смола од бреза, на ист начин како што децата денес џвакаат гуми за џвакање. Експерти од Универзитетот во Стокхолм ги анализирале тие остатоци со цел да утврдат што јаделе луѓето во каменото доба.

Анализата на научниците открила остатоци од месо од елен и пастрмка, јаткасти плодови и дека луѓето од камено доба обработувале крзно од волк и лисица со заби и страдале од болести на усната шуплина, пишува британското научно списание „ИфлСаенс“ (IFLScience).

10,000-Year-Old Chewing Gum Reveals Stone Age Diet And Poor Oral Healthhttps://t.co/xl9YGA1T0s

— IFLScience (@IFLScience) January 19, 2024

– Во џваканата смола од бреза од Хусеби Клев има богатство од секвенци на ДНК, во неа откривме бактерии поврзани со периодонтитис, како и ДНК на растенија и животни кои се џвакале претходно – изјави д-р Емрах Кирдок, експерт од Одделот за биотехнологија на Универзитетот во Мерсин и координатор за истражување, во соопштението.

Три парчиња џвакана смола од бреза, која се користела како лепак за време на каменото доба, биле откриени во 1990-тите на локалитетот наречен Хусеби Клев. Врз основа на истражувањата, утврдено е дека староста на талогот во кој се пронајдени примероците е стар меѓу 9.540 и 9.890 години.

– Ова ни дава увид во животот на мала група ловци-собирачи на скандинавскиот западен брег. Откривме дека овие тинејџери јаделе елени, пастрмка и лешници, а најмалку еден од нив имал сериозни проблеми со забите – изјави проф. Андерс Гетерстром, експерт во Центарот за палеогенетика.

За да потврдат дека пронајдените примероци навистина биле џвакани од луѓе, авторите на студијата ги споредиле секвенците на ДНК на микробите присутни во смолата со модерни и антички плунковни микробиоми и откриле голем број бактерии поврзани со периодонтитис (болест на непцата), како што е Treponema denticola , Streptococcus anginosus и Slakia exigu. Други пронајдени бактериски видови, според авторите на студијата, предизвикуваат кариес.