Со излегувањето на „Гранд тефт ауто 6“, кое се очекува следната година, во индустријата на видеоигри сè погласно се води расправа за стратегиите на одредување цени за премиум-насловите. Во најновата епизода на подкастот „Дејли Варајети“ се анализираа токму овие трендови од светот на забавата, пишува „Варајети“.

Новинарката Џенифер Мас објаснува дека цената од 80 долари стана жешка тема во индустријата. Годинава „Нинтендо“ го подигна нивото со играта „Марио карт ворлд“. „Мајкрософт“ се обиде да го следи примерот, но на крајот ја врати цената за „Ди аутер ворлдс 2“ на стандардните 70 долари, што беше референтна цена за врвни наслови во последните пет години.

„Разговорот за цените на игрите продолжува – колку луѓето се подготвени да платат, која е фер цена имајќи ја предвид количината време и труд вложени во нивната изработка“, вели Мас. Во неодамнешно интервју со извршниот директор на „Тејк-Ту Интеректив“, Страус Зелник, таа го прашала за цената на „Гранд тефт ауто 6“, најочекуваното издание во последните години, кое треба да излезе во мај 2026 година.

Од „Тејк-Ту“ засега не откриваат детали, но ако некогаш постоел наслов кој може да ја оправда повисоката цена, тоа е токму „ГТА 6“. Очекувањата се огромни, особено бидејќи поминаа повеќе од десет години од излегувањето на „ГТА 5“.

„За нешто како ‘ГТА 6’, сигурно би можеле да наплатат 80 долари, па дури и повеќе, а луѓето сепак би платиле затоа што играта ќе биде толку голема“, забележува Мас.

Мас се осврнува и на прашањето зошто „Гранд тефт ауто“ е толку популарна игра. Според неа, тоа беше една од првите игри што успеа да се наметне кај повремените гејмери како задолжително забавно искуство.

„Тука има многу милениумска носталгија. Има и носталгија кај генерацијата Икс. Тоа беше една од првите големи игри што привлече многу луѓе, во зависност од тоа колку сте биле млади во тоа време“, вели Мас.