Фудбалерите на Манчестер сити ја имаат својата најслаба сезона откако Пеп Гвардиола седна на тренерската клупа пред девет години и големото прашање е дали сезонава ќе стигнат до Лигата на шампионите. „Граѓаните“ моментално се петти на табелата во Премиер лигата, два бода зад Нотингем форест и 21 бод зад лидерот Ливерпул.

Сити беше елиминиран во четвртото коло од Лига Купот, како и од Лигата на шампионите во плејофот, а неговата единствена шанса за трофеј е ФА Купот, каде што во полуфиналето ќе се соочат со Нотингем форест.

Веќе се зборува сериозно дека Гвардиола нема да го води Сити следната сезона, а би било големо изненадување ако Џек Грилиш остане на „Етихад“.

Тој е најскапиот фудбалер во историјата на клубот, откако Сити пред две години ѝ плати на Астон Вила 118 милиони евра за него. Сега можно е да го продаде, и тоа на истиот клуб од Бирмингем, за „само“ 35 милиони.

Според британските медиуми, три клуба се издвојуваат како најверојатни следни дестинации за Грилиш. Тоа се Тотенхем, Њукасл (кој под саудиско водство стана најбогатиот клуб во светот) и „неговата“ Астон Вила.

Откако се приклучи на Манчестер сити, Грилиш одигра вкупно 155 мечеви, постигна 17 голови и имаше 23 асистенции во сите натпреварувања. Во оваа сезона Грилиш настапи на 19 натпревари од Премиер лигата, постигнувајќи еден гол и запишувајќи една асистенција.