Македонија бележи напредок во борбата против корупцијата стои во најновиот извештај на Групата на држави против корупцијата на Советот на Европа (ГРЕКО). Ова антикорупциско тело го заврши надзорот за Македонија во петтата рунда на евалуација, при што наведува дека земјата има напредок во спроведувањето на нејзините препораки насочени кон спречување на корупцијата во највисоките извршни функции на централната влада и полицијата.

Во извештајот објавен во Стразбур, се заклучува дека земјава задоволително имплементирала 17 од 23-те препораки содржани во извештајот за евалуација од 5-тата рунда, усвоен во 2019 година. Шест препораки остануваат делумно имплементирани.

ГРЕКО ги поздравува преземените чекори за подобрување на транспарентноста и промовирање на интегритетот во однос на лицата на кои им се доверени врвни извршни функции. Новиот правилник за работа на владата сега овозможува јавен пристап преку интернет до списокот на лица поканети или присутни на владини поткомитети и работни групи. Усвоени се нови упатства за пријавување и обработка на подароци, а во тек е развој на онлајн каталог со детали за подароците.

ГРЕКО, исто така, забележува напредок, особено во законската реформа насочена кон зајакнување на оперативната независност на полицијата и нејзините механизми за внатрешен и надворешен надзор. Сепак, потребни се понатамошни напори за да се обезбедат објективни и транспарентни проценки и да се зајакне заштитата на дојавувачите.

Друг позитивен развој е создавањето електронска база на податоци за регистрирање и проверка на анкетните листови за имотот на избраните и именуваните јавни функционери, иако таа сè уште не е целосно оперативна. Нацрт-измените на Законот за спречување на корупција и судир на интереси, насочени кон зајакнување на режимот на санкционирање, се очекува да бидат усвоени до крајот на 2025 година.

„Спроведена е анализа за проценка на процесите и практиките на Одделот за следење на имотната состојба на Државната комисија за спречување на корупција, но спроведувањето на препораките што произлегуваат од ова останува во тек и ќе бара континуирано следење и посветеност за да се обезбедат опипливи подобрувања“ се наведува во извештајот.

Македонските власти се охрабруваат да го информираат ГРЕКО за сите понатамошни случувања во врска со целосното спроведување на преостанатите препораки.

„Особено, ГРЕКО со нетрпение очекува ажурирања за воспоставувањето на регистарот на подароци; целосната операционализација на базата на податоци за електронските изјави за имотот за избраните и именуваните функционери; подобрувањата направени во режимот на санкционирање за прекршувања на правилата за судир на интереси, интегритет и антикорупција, промените во постапките за тестирање на интегритетот во полицијата, вклучително и нивната евалуација; и практичната примена на законодавството за заштита на дојавувачите во рамките на полициските сили“ стои во извештајот на ГРЕКО.