Грција планира да воведе такса од 20 евра за посетителите кои пристигнуваат со брод за крстарење на островите Санторини и Миконос за време на летната сезона. Целта е да се спречи прекумерниот туризам, изјави денеска премиерот Киријакос Мицотакис, цитиран од Ројтерс.

Туризмот е главен двигател на грчката економија, која сè уште се опоравува од децениската криза.

Сепак, некои од најпопуларните дестинации во Грција, вклучувајќи го Санторини, идиличен остров со шарени села и недопрени плажи, дом на 20.000 луѓе, се во опасност да бидат уништени од прекумерниот туризам.

На прес-конференција еден ден откако ги изнесе главните економски мерки на неговата влада за 2025 година, Мицотакис појасни дека прекумерниот туризам е проблем само во некои места во Грција.

„Грција нема структурен проблем со надтуризмот. Некои од дестинациите имаат значителен проблем во одредени недели или месеци од годината, со кои треба да се справиме“, рече тој.

„Круз туризмот ги оптоварува Санторини и Миконос и затоа преземаме мерки“, додаде тој, најавувајќи ја новата такса.

Приходите од туризмот на Грција се проценуваат на околу 20 милијарди евра во 2023 година, на сметка на речиси 31 милион туристички посети.

Во Санторини, демонстрантите повикаа на ограничување на туризмот, слично на повиците во други популарни европски места за одмор, вклучувајќи ги Венеција и Барселона.

Дел од приходот од таксата за туризам за крстарење ќе се врати во локалните заедници за да се инвестира во инфраструктурата, рече Мицотакис.

Тој, исто така, посочи дека владата планира да го регулира бројот на бродови за крстарење кои пристигнуваат на одредени дестинации во исто време, а треба да се воспостават и правила за заштита на животната средина и справување со недостигот на вода на островите.

Грција, исто така, сака да го зголеми данокот за краткорочно изнајмување и да забрани нови лиценци за такви изнајмувања во центарот на Атина за да го зголеми бројот на домови достапни за постојаните жители, изјави денеска Мицотакис.

Владата утре ќе образложи дел од мерките.