Жителите на Грчец веќе два дена се без струја, откако ЕВН го исклучила селото од напојување поради неконтролирани кражби на струја. Дел од жителите на селото денеска излегоа на протест пред подружницата на ЕВН во Ѓорче Петров, жалејќи се дека и во претходните денови имале прекини во електричната енергија, но веќе два дена воопшто немаат струја, објави „Алсат“.

Велат дека ЕВН ги казнува и оние кои плаќаат за електричната енергија, поради неплаќачите.

Од ЕВН објаснуваат дека во селото вчера околу 8 часот наутро настанал дефект кој е последица на кражбите на електрична енергија од страна на мештаните, односно неовластено и неконтролирано користење. Нивните екипи често се соочувале со вербални и физички напади поради што во целост се нарушува работењето.

„Невозможно е да се санираат дефекти се додека на вработените на терен им е спречен пристапот до самите енергетски објекти и немаат нормални услови за работа“, велат од ЕВН.

Оттаму додаваат дека трафостаниците се преоптоваруваат и оштетуваат, како и останатата енергетска опрема, а како резултат се појавуваат сериозни дефекти.