Во чест на 24 Мај – Ден на сесловенските просветители Св. Кирил и Методиј на 21 мај се одржа Десеттото издание на меѓународниот поетски фестивал „Литературни искри“ во НУ Центар за култура „АСНОМ“ во Гостивар.

Комисијата во состав Маја Апостолоска, претседател, и членовите Бранко Цветкоски и Слаѓана Брезовска, највисоката награда Гран-при на „Литературни искри 2023“ ја додели на поетесата Сара Ѓорѓијоска од Куманово.

За најдобар странски автор е прогласена Александра Вујишиќ од Подгорица, Црна Гора. Првата награда ѝ припадна на Лидија Размоска Тримовска од Скопје, втората на Силвана Димитриевска од Скопје, а третата награда на Анета Велкоска Ода од Скопје. За најуспешна млада искра е прогласена 17-годишната Марија Јанчевска од Скопје.

Пред свеченото доделување на наградите во Центарот за култура во Гостивар, дванаесетте финалисти ги прочитаа нивните дела со кои учествуваа на конкурсот.

Оваа година во две возрасни категории се пријавија 184 поети од Македонија, Словенија, Романија, Албанија, Србија, Хрватска и Црна Гора. Во склоп на манифестацијата беше промовирана најновата заедничка поетска збирка „Литературни искри 2023“.

Организаторите на фестивалот, традиционално на наградените поетеси им доделија плакети, а на останатите финалисти и застапени автори во заедничката поетска збирка им додели дипломи.

Реализацијата на јубилејното издание на „Литературни искри“ беше поддржана од Министерството за култура и Општина Гостивар. Носител на проектот е Здружение „Милениум“.

(Текстот е објавен во „Културен печат“ број 180, во печатеното издание на весникот „Слободен печат“ на 27-28.5.2023)