Директорот на Управата за извршување санкции, Александар Пандов, во гостувањето на подкастот „Курир“, „Наткаст“, рече дека големи суми пари се вртат по затворите, и тоа не само во однос на мобилните телефони до кои доѓаат притворениците или осудениците.

-Кога дојдов на позицијата, ми беше кажано дека грам хероин или кокаин е поевтин отколку на улица да купите. Како зависник поедноставно ќе имате дилер кој ќе ви набавува дрога отколку на улица. Наследивме исклучително корумпиран систем. Сега сме доведени во ситуација со истите вработени да го оправаме. Има добар процент на луѓе кои се чесни и си ја сакаат работата, но и на нив им е тешко затоа што се борат против оние кои формално правно треба да бидат од нивна страна, а се од другата страна. Се соработници на оние луѓе кои лежат во затворите, вели Пандов.

Директорот изрази очекување дека во кратко идно време ќе има повисока бројка на нововработени, посочувајќи дека во моментов недостасуваат над 200 затворски полицајци во затворите.