Здружената иницијатива Зелен хуман град денеска во Скопје организира протестен марш „За чист воздух“. Протестот ќе започне во 16 часот пред Министерство за животна средина и просторно планирање и ќе продолжува преку Собранието, а ќе заврши пред зградата на Владата.

Во изјавата од Зелен хуман град велат дека голем број од луѓето, секоја година умираат како последица од загаденоста на воздухот и изложеноста на штетните ПМ честички. Со овој протест, тие повикуваат на поголема колективна свест:

– Протестираме бидејќи секоја година од 3.828 до 5000+ луѓе во Македонија ги губат своите животи како директна последица на изложеноста на штетните честички PM2.5. Ова претставува 17,7% од вкупната смртност во државата. Особено загрижувачки е фактот дека едно од девет починати деца под една година го губи животот поради загадениот воздух. Бараме од надлежните институции итно и системско справување со загадувањето на воздухот преку имплементација на овие ефикасни мерки кои ќе го заштитат здравјето на граѓаните и драстично ќе го намалат аерозагадувањето – наведуваат од Зелен хуман град.

Од Здружената иницијатива ги повикуваат граѓаните да се приклучат на протестот и да го изразат своето барање за чист воздух од институциите. Протестот е организиран во соработка со Шанса за Центар, Skopje Smog Alarm, O2 Иницијатива, Зелените Од Гази Баба, Иницијатива за ослободување од еднократна пластика НаТочак – NaTochak, Go Green – Биди Зелен, Слобода на Говорот и други организации.

Мерките кои ги предлагаат од Зелен хуман град, погледни ги тука.