Во ЈУ Градска библиотека „Браќа Миладиновци“ – Скопје (ГБСК) на 25 јуни, во 19 часот, во Паркот на поезијата (во дворот на библиотеката), ќе се одржи промоција на изданието „Антологија на иднината“ – избор творби од работилницата за креативно пишување, одржана минатата година.

Книгата „Антологија на иднината“ содржи песни, проза и есеи на 23 млади автори, учесници на работилницата за креативно пишување иницирана и реализирана од ГБСК. Двомесечната работилница ја водеше писателот Александар Русјаков, кој е и уредник на изданието. Автор на корицата е еден од учесниците – Борис Дебси, лектор е Денис Бојаров, а техничката обработка е на Јованчо Димоски. Издавањето на книгата е поддржано од Град Скопје.

Објавувањето на „Антологија на иднината“, како дел од издавачката дејност на ГБСК, е заокружување на целиот процес, што тргнува од премисата институцијата да биде повторно атрактивно место за младите креативци – подвлекува во предговорот директорката Снежана Стојчевска.

– Се восхитувам на оваа силна буица од младешка енергија и искреност, која верувам дека ги задоволува и највисоките книжевни критериуми. Особено сум горда што Библиотеката е издавач на оваа „Антологија на иднината“ – истакнува Стојчевска.

За писателот Русјаков, ова е збирка поезија и проза на исклучително свои и посебни млади книжевни автори од една „обична“ креативна работилница.

– Зад овие редови не се крие, туку се објавува она за кое верувам дека може да стане иднина на книжевната уметност во светот и кај нас во татковината, секако, ако тие одлучат да ја жртвуваат својата удобност и вообичаено воспоставените норми и правила, оти уметноста истовремено вреска и тихува во утробата – напиша Русјаков.

На промоцијата за „Антологија на иднината“ ќе говорат Стојчевска, Русјаков и Александра Јуруковска – координатор на проектот.

Свои творби ќе читаат дел од авторите застапени во Антологијата: Михаела Стефановска, Софија Добревска, Александра Арсовска, Давор Стефановски, Хана Трајкоска, Методија Тасевски, Никола Ристовски, Нино Наумовски, Иво Донев, Матеа Јовановска, Бојана Цветковска, Јована Вуковиќ, Маша Тодевска и Михаела Сталеска. Модератор на настанот ќе биде актерот Андреј Серафимовски, а во музичкиот дел ќе настапи младиот панк-бенд „Малери“.